१० एप्रिलला विषय समिती सदस्यांच्या निवडी..
सोलापूर : सोलापूर जिल्हा परिषदेची पहिली सर्वसाधारण सभा २२ ते २५ एप्रिलदरम्यान होण्याची शक्यता असून, त्यापूर्वी पाचही विषय समित्यांच्या सदस्यांची निवड केली जाणार आहे. नुकत्याच पार पडलेल्या अध्यक्ष, उपाध्यक्ष व सभापतींच्या निवडीनंतर आता विषय समित्यांच्या सदस्य रचनेकडे लक्ष केंद्रित झाले आहे.
१८ मार्च रोजी जिल्हा परिषदेच्या अध्यक्ष व उपाध्यक्षपदांची निवड प्रक्रिया पूर्ण झाली. त्यानंतर शुक्रवारी विविध विषय समिती सभापतींच्या निवडीही पार पडल्या. आता पुढील टप्प्यात १० किंवा १२ एप्रिल रोजी पाचही विषय समित्यांच्या सदस्यांची निवड केली जाणार आहे. या निवडी पूर्ण झाल्यानंतरच जिल्हा परिषदेचे नियमित कामकाज सुरू होणार आहे.नियमानुसार, विषय समिती सदस्यांची निवड झाल्यानंतर पुढील १२ दिवसांच्या आत सर्वसाधारण सभा घेणे बंधनकारक आहे.
त्यामुळे १० एप्रिलनंतरचा कालावधी लक्षात घेता २२ ते २५ एप्रिलदरम्यान पहिली सर्वसाधारण सभा आयोजित केली जाण्याची शक्यता वर्तवली जात आहे.या पहिल्या सभेत विविध विकासकामे, विभागनिहाय आढावा, तसेच आगामी धोरणात्मक निर्णयांवर चर्चा होण्याची अपेक्षा आहे. नव्याने निवडून आलेल्या पदाधिकाऱ्यांसाठी ही सभा महत्त्वाची मानली जात असून, जिल्हा परिषदेच्या पुढील कामकाजाची दिशा या बैठकीत ठरणार आहे.
