सोलापूर : सोलापूर जिल्हा परिषद आणि पंचायत समिती सार्वत्रिक निवडणूक २०२६ मध्ये दक्षिण सोलापूर तालुक्यातील ११३-कासेगाव गणातून भारतीय जनता पार्टीचे उमेदवार विजय उमाकांत राठोड यांनी दणदणीत विजय संपादन केला आहे.
काल ९ फेब्रुवारी २०२६ रोजी निवडणुकीचा निकाल लागल्यानंतर निवडणूक निर्णय अधिकारी अंजली प्रशांतसिंह मरोड यांनी त्यांना विजयाचे अधिकृत प्रमाणपत्र प्रदान केले.हा निकाल राजकीय वर्तुळात विशेष चर्चेचा ठरला आहे, कारण विजय राठोड हे काँग्रेसचे दिवंगत ज्येष्ठ नेते उमाकांत राठोड यांचे सुपुत्र आहेत. उमाकांत राठोड यांनी दक्षिण सोलापूर पंचायत समितीचे सभापतीपद भूषवले होते.
आपल्या वडिलांचा राजकीय वारसा काँग्रेसमध्ये असतानाही, विजय राठोड यांनी भारतीय जनता पार्टीच्या माध्यमातून निवडणूक रिंगणात उतरण्याचा निर्णय घेतला होता. कौटुंबिक वारसा आणि भाजपची संघटनात्मक बांधणी यांच्या जोरावर त्यांनी सर्वसाधारण प्रवर्गातून हा विजय खेचून आणला आहे.कासेगाव गणातील मतदारांनी विजय राठोड यांच्या नेतृत्वावर विश्वास दर्शवल्याने आता या भागात भाजपची ताकद अधिक मजबूत झाली आहे.
विजयानंतर समर्थकांनी सोलापूरमध्ये गुलालाची उधळण करत जल्लोष साजरा केला. आपल्या वडिलांचा जनसेवेचा वारसा आपण भाजपच्या माध्यमातून समर्थपणे पुढे नेऊ आणि मतदारसंघाच्या विकासासाठी कटिबद्ध राहू, असा विश्वास विजय राठोड यांनी यावेळी व्यक्त केला.\
