सोलापूर : रेल्वे स्थानक, भैय्या चौक परिसरातील जुन्या उड्डाणपुलाचे पाडकाम हाती घेण्यात येणार असल्याने मध्य रेल्वेच्या सोलापूर विभागात १४ डिसेंबर २०२५, रविवार रोजी तब्बल साडेबारा तासांचा मेगाब्लॉक घोषित करण्यात आला आहे. या कामामुळे सोलापूर विभागातून धावणाऱ्या ११ गाड्या पूर्णपणे रद्द करण्यात आल्या असून, ८ गाड्या वळवण्यात आल्या आहेत. प्रवाशांनी याची नोंद घ्यावी असे आवाहन रेल्वे प्रशासनाच्यावतीने करण्यात आले आहे.
रद्द करण्यात आलेल्या गाड्यांमध्ये पुणे-सिकंदराबाद शताब्दी एक्सप्रेस देखील रद्द राहील. मेगाब्लॉकमुळे वाहतूक सुरळीत ठेवण्यासाठी ८ गाड्यांच्या मार्गात बदल करण्यात आला आहे. तसेच, काही पॅसेंजर गाड्या त्यांच्या नियोजित स्थानकापूर्वीच थांबवण्यात येणार आहेत. म्हैसूर-पंढरपूर एक्सप्रेस, टीव्हीसी-सीएसएमटी एक्सप्रेस या गाड्या सोलापूरकडे न जाता वळवण्यात आलेल्या मार्गाने धावतील.
पुणे-सोलापूर एक्सप्रेस कुर्डुवाडी पर्यंतच धावेल, तर सोलापूर-हासन एक्सप्रेस कलबुरगी येथून सुरू होईल. हा ब्लॉक सोलापूर येथील रेल्वे ओव्हर ब्रीजचे सुपर स्ट्रक्चर आणि सब स्ट्रक्चर तोडण्यासाठी घेण्यात आला आहे. कामाची सुरुवात १० डिसेंबरपासून तयारीच्या टप्प्याने होईल. १४ डिसेंबर रोजी मुख्य १२:३० तासांच्या ब्लॉकमध्ये क्रेनच्या साहाय्याने पुलाचे गर्डर उचलून हटवले जातील
रेल्वे प्रशासनाने केले प्रवाशांना आवाहन केले असून १४ डिसेंबर रोजी प्रवास करण्यापूर्वी त्यांच्या गाडीची स्थिती निश्चितपणे तपासून घ्यावी. तसेच, ब्लॉक संपल्यानंतर ट्रॅक सुरक्षित असल्याची खात्री झाल्यावर पहिली गाडी फक्त १० KMPH च्या वेगाने चालवली जाणार आहे.
