सोलापूर: महाराष्ट्र लोकसेवा आयोगाच्या (MPSC) वतीने घेण्यात आलेल्या दिवाणी न्यायाधीश (कनिष्ठ स्तर) व न्यायदंडाधिकारी (प्रथम वर्ग) म्हणजेच Jmc परीक्षेचा अंतिम निकाल जाहीर झाला असून, सोलापूरच्या शिरपेचात मानाचा तुरा रोवला गेला आहे. सोलापूरचे सुपुत्र प्रथमेश शिंदे यांनी या परीक्षेत संपूर्ण महाराष्ट्रात द्वितीय क्रमांक पटकावून घवघवीत यश संपादन केले आहे. त्यांच्या या निवडीमुळे सोलापूरच्या विधी क्षेत्रात आनंदाचे वातावरण पसरले असून सर्वच स्तरातून त्यांच्यावर कौतुकाचा वर्षाव होत आहे.
प्रथमेश शिंदे यांचे हे यश त्यांच्या अथक परिश्रमाचे आणि सातत्याचे फळ आहे. अत्यंत कठीण समजल्या जाणाऱ्या या परीक्षेत त्यांनी पहिल्याच प्रयत्नात राज्याच्या गुणवत्ता यादीत दुसरे स्थान मिळवून आपली बुद्धिमत्ता सिद्ध केली आहे. न्यायालयातून सर्वसामान्यांना न्याय मिळवून देण्याचे स्वप्न उराशी बाळगून त्यांनी कायद्याचा सखोल अभ्यास केला होता.
प्रथमेश यांचे प्राथमिक आणि माध्यमिक शिक्षण सोलापुरातच झाले. कायद्याची पदवी संपादन केल्यानंतर त्यांनी स्पर्धा परीक्षेचा मार्ग निवडला. दिवसातील अनेक तास वाचन, चालू घडामोडींचा अभ्यास आणि कायद्यातील कलमांचे अचूक विश्लेषण यामुळे त्यांना हे यश प्राप्त झाले आहे. ‘निकालाच्या यादीत आपले नाव पाहणे हा आनंदाचा क्षण आहे, पण राज्यात दुसरा येणे हा धक्कादायक सुखद अनुभव आहे,’ अशी भावना प्रथमेश यांनी व्यक्त केली आहे.
सोलापूर जिल्ह्याने आजवर अनेक सनदी अधिकारी आणि खेळाडू देशाला दिले आहेत. आता न्यायदानाच्या पवित्र क्षेत्रातही सोलापूरचा टक्का वाढत असल्याचे प्रथमेश शिंदे यांच्या निवडीने स्पष्ट झाले आहे. त्यांच्या या यशामुळे स्पर्धा परीक्षेचा अभ्यास करणाऱ्या जिल्ह्यातील शेकडो तरुणांना नवीन प्रेरणा मिळाली आहे.या यशाचे श्रेय प्रथमेश यांनी आपल्या आई-वडिलांना आणि मार्गदर्शकांना दिले आहे. कौटुंबिक पाठबळ आणि गुरुजनांनी दाखवलेला योग्य मार्ग यामुळेच मी इथपर्यंत पोहोचू शकलो, असे त्यांनी आवर्जून नमूद केले. निकालाची बातमी समजताच त्यांच्या निवासस्थानी मिठाई वाटून आणि फटाके फोडून आनंदोत्सव साजरा करण्यात आला.
