सोलापूर : जिवाला जीव देणारी मित्र फार कमी असतात. अशातच सोलापूरमधील प्रसिद्ध सिद्धेश्वर तलावात फिरायला गेलेल्या मित्रांसोबत धक्कादायक घटना घडली. सिद्धेश्वर तलावात सोशल मीडियासाठी रील्स बनवण्याच्या नादात एका 16 वर्षीय विद्यार्थ्याचा बुडून दुर्दैवी मृत्यू झाला आहे. सुरंजन शेंडगे असे या मृत तरुणाचे नाव असून, तो मूळचा फलटण येथील रहिवासी होता. रविवारी दुपारी 4 वाजेच्या सुमारास ही धक्कादायक घटना घडली असून, या घटनेमुळे परिसरात मोठी हळहळ व्यक्त केली जात आहे.
सुरंजन गटांगळ्या खाऊ लागला : मिळालेल्या माहितीनुसार, सुरंजन हा आपल्या बेलेराव आणि माळवदकर या दोन मित्रांसह तलावात पोहण्यासाठी गेला होता. गणपती घाटावरून त्याने पाण्यात उडी मारली आणि त्याचे मित्र मोबाईलवर शूटिंग करत होते. मात्र, पाण्यात उडी मारल्यानंतर अचानक नाका-तोंडात पाणी गेल्यामुळे सुरंजन गटांगळ्या खाऊ लागला. त्याला वाचवण्यासाठी त्याच्या एका मित्राने प्रयत्न केला, पण परिस्थिती हाताबाहेर गेली. सिध्देश्वर तलावात असं काय होतं, ज्यामुळे पोहण्यात तरबेज असणारे दोघंही बुडाले, असा सवाल विचारला जातोय.
बेलेरावने वाचवण्यासाठी उडी मारली सुरंजनला बुडताना पाहून बेलेराव याने त्याला वाचवण्यासाठी तातडीने पाण्यात उडी मारली, परंतु पाण्याचा अंदाज न आल्याने तो स्वतःही बुडू लागला. हे पाहून तिसऱ्या मित्राने आरडाओरडा केला, तेव्हा एका होडी चालकाने प्रसंगावधान राखत बेलेराव याचे प्राण वाचवले. दुर्दैवाने, सुरंजन पाण्याचा मध्यभागी असल्याने तोपर्यंत खोलवर बुडाला होता आणि कोणालाही त्याला वेळेत बाहेर काढता आले नाही. सुरंजन हा आपल्या आई-वडिलांचा एकुलता एक मुलगा होता आणि तो सोलापुरात डिप्लोमाचे शिक्षण घेत होता. तो आपल्या चुलत मावस भावाकडे राहून आपले भविष्य घडवण्याचे स्वप्न पाहत होता.
