सोलापूर : कै. वि. गु. शिवदारे यांच्या जन्मशताब्दीनिमित्त वि. गु. शिवदारे प्रतिष्ठान आणि दक्षिण सोलापूर तालुका मुख्याध्यापक संघ यांच्या संयुक्त विद्यमाने मुख्याध्यापकांसाठी गुरुवार, २ एप्रिल रोजी सकाळी दहा ते दुपारी चारपर्यंत शिवदारे महाविद्यालय, जुळे सोलापूर येथे कार्यशाळेचे आयोजन करण्यात आले आहे.
यावेळी दक्षिण सोलापूर तालुका शिक्षण मंडळाचे अध्यक्ष राजशेखर शिवदारे हे अध्यक्षस्थानी राहणार असून आमदार प्रा. जयंत आसगावकर, शिक्षणाधिकारी सचिन जगताप आणि मुख्याध्यापक महामंडळाचे अध्यक्ष प्रा. सुभाष माने उपस्थित राहणार आहेत.कार्यशाळेत शैक्षणिक प्रशासकीय विषयांवर मार्गदर्शन केले जाणार आहे. ‘मुख्यमंत्री माझी शाळा’, ‘शालेय प्रशासनात आयटीचा वापर’, ‘ब्लॉग, व्हिडिओ निर्मिती व सोशल मीडियाचा वापर’ आदी विषयांवर तज्ज्ञांकडून मार्गदर्शन होणार आहे.
यामध्ये डॉ. प्रभाकर बुधारम, प्रा. व्यंकटेश पोटाबत्ती, डॉ. गणेश मुंडावकर आणि अमर शंकर हे व्याख्याते सहभागी होणार आहेत. या कार्यशाळेसाठी दक्षिण सोलापूर, अक्कलकोट तालुक्यातील मुख्याध्यापकांनी उपस्थित रहावे संघाचे जिल्हा उपाध्यक्ष श्रावण बिराजदार यांनी सांगितले.
