सोलापूर : सांगोला येथून गुन्ह्याचे काम आटोपून पंढरपूरच्या दिशेने येत असताना लाचलुचपत प्रतिबंधक विभागाच्या पोलिस अधिकाऱ्यांनी प्रसंगावधान साधून भीषण अपघातातील जखमी चालकाचा जीव वाचविला.गंभीर जखमी अवस्थेत केबिनमध्ये अडकलेल्या चालकाला बाहेर काढून तातडीने रुग्णालयात दाखल करण्यात आले.
ही घटना शुक्रवारी (ता. ६) पहाटे ५.४५ च्या सुमारास खर्डी (ता. पंढरपूर) गावाच्या हद्दीत घडली. लाचलुचपत प्रतिबंधक विभागाचे पोलिस निरीक्षक रवींद्र लांभाते हे अंमलदार नरोटे व किनगी यांच्यासह सांगोला येथील शासकीय कामकाज आटोपून पंढरपूरकडे येत होते. खर्डी गावाजवळ त्यांना एका पिकअपचा भीषण अपघात झाल्याचे दिसून आले. अपघाताची तीव्रता इतकी होती की पिकअपच्या समोरील भागाचा पूर्ण चक्काचूर झाला होता आणि चालक स्टेरिंगमध्ये अडकून विव्हळत होता.काही वाहने थांबवून मदत घेण्याचा प्रयत्न केला, मात्र पिकअपचा पत्रा निघत नव्हता. त्यानंतर एक ट्रक थांबवून दोरीच्या साहाय्याने पिकअपचा पत्रा बाजूला ओढण्यात आला.
सुमारे ३० ते ३५ मिनिटांच्या प्रयत्नांनंतर चालकाला केबिनमधून बाहेर काढण्यात यश आले. जखमीला तातडीने रुग्णवाहिकेतून पंढरपूर येथील शासकीय रुग्णालयात दाखल केले. वेळेत मदत मिळाल्यामुळे त्याचे प्राण वाचले असून सध्या त्याच्यावर उपचार सुरू आहेत.
नाशिकहून पंढरपूरकडे येताना अपघात : नाशिक येथील पिकअप चालक द्राक्ष घेऊन पंढरपूरच्या दिशेने येत होता. पहाटेच्या सुमारास रस्त्यात थांबलेल्या एका वाहनाला पिकअपची जोरदार धडक बसली. धडक दिल्यानंतर समोरील वाहन निघून गेले. त्यामुळे पिकअप चालक गंभीर जखमी होऊन केबिनमध्ये अडकून पडला होता. दरम्यान, सांगोल्यातील संगेवाडी येथील मंडलाधिकारी विजया नाईक व त्यांचा खासगी चालक वैभव मोरे यांच्याविरुद्ध सात हजार रुपयांची लाच घेतल्याची कारवाई करून पोलिस निरीक्षक लांभाते सोलापूरकडे परत येत असताना त्यांनी अपघातग्रस्त चालकाला मदत करून त्याचे प्राण वाचविले.
