सोलापूर झेडपीत बदल्यांवरून खळबळ; चौकशीअंती प्रशासकीय कारवाईचा बडगा.
सोलापूर; सोलापूर जिल्हा परिषदेत कर्मचाऱ्यांच्या बदल्यांचा मुद्दा पुन्हा एकदा चर्चेत आला असताना मुख्य कार्यकारी अधिकारी कुलदीप जंगम यांनी कडक भूमिका घेत आरोग्य विभागातील कनिष्ठ प्रशासन अधिकारी नागेश (नागनाथ) पाटील यांची कुर्डूवाडी पंचायत समितीकडे स्थानांतरण बदली केली आहे.
सर्वसाधारण बदल्यांमध्ये आरोग्य विभागातील काही कर्मचाऱ्यांना बदल्यांमधून सूट देण्यात आल्याची तक्रार प्रशासनाकडे करण्यात आली होती. विशेषतः नागेश पाटील यांना बदलीतून वाचविण्यात आल्याची चर्चा होती. या तक्रारीची दखल घेत सीईओ जंगम यांनी चौकशीचे आदेश दिले होते. चौकशीत बदल्यांमध्ये काही अनियमितता आढळून आल्यानंतर जंगम यांनी तत्काळ कारवाई करत मुख्यालयात कार्यरत असलेल्या पाटील यांना कुर्डूवाडी पंचायत समितीकडे स्थानांतरित केले.
