सोलापूर: दक्षिण सोलापूर तालुक्यातील नागरिकांच्या आरोग्याची काळजी घेण्यासाठी आणि त्यांना एकाच छताखाली सर्वसमावेशक वैद्यकीय उपचार उपलब्ध करून देण्यासाठी ‘आधार सुपर स्पेशालिटी हॉस्पिटल’ सज्ज झाले आहे. या अत्याधुनिक हॉस्पिटलचा भव्य उद्घाटन सोहळा शनिवार, ७ मार्च २०२६ रोजी सायंकाळी ०६:०० वाजता आयोजित करण्यात आला आहे.
या नूतन वास्तूचे उद्घाटन श्री सिद्धेश्वर कृषी उत्पन्न बाजार समितीचे संचालक मनिष देशमुख यांच्या शुभहस्ते संपन्न होणार आहे. याप्रसंगी परिसरातील राजकीय, सामाजिक आणि वैद्यकीय क्षेत्रातील मान्यवर उपस्थित राहणार आहेत.मंद्रुप येथील लोकसेवा शाळेसमोर असलेल्या या हॉस्पिटलमध्ये आधुनिक वैद्यकीय उपकरणे आणि तज्ज्ञ डॉक्टरांची टीम उपलब्ध असेल. ग्रामीण भागातील रुग्णांना तातडीच्या उपचारांसाठी शहराकडे धाव घ्यावी लागू नये, या उद्देशाने या हॉस्पिटलची निर्मिती करण्यात आली आहे.
या सोहळ्याचे निमंत्रक डॉ. योगेश राठोड आणि डॉ. शितल पवार-राठोड असून, त्यांच्या संकल्पनेतून हे रुग्णालय साकारले आहे. या कार्यक्रमासाठी सोनाई फाऊंडेशनचे संस्थापक अध्यक्ष युवराज राठोड आणि युवा उद्योजक राजाभाऊ राठोड हे स्वागतोत्सुक म्हणून उपस्थित राहतील.या मंगल प्रसंगी दक्षिण सोलापूर आणि मंद्रुप परिसरातील सर्व नागरिकांनी बहुसंख्येने उपस्थित राहावे, अशी माहिती संस्थापक अध्यक्ष युवराज राठोड यांनी दिली आहे..
