सोलापूर: शासकीय कामाचा मोबदला देण्यासाठी कंत्राटदाराकडून लाचेची मागणी करून त्यातील पहिला हप्ता स्वीकारणाऱ्या एका महिला ग्रामपंचायत अधिकाऱ्याला लाचलुचपत प्रतिबंधक विभागाने (ACB) सापळा रचून रंगेहात पकडले आहे.
या कारवाईमुळे सोलापूर जिल्ह्याच्या महसूल आणि ग्रामपंचायत विभागात मोठी खळबळ उडाली आहे. मिळालेल्या माहितीनुसार, आरोपी लोकसेवक श्रीमती पूजा बाबासाहेब लोंढे (वय ३८ वर्षे) या माळशिरस तालुक्यातील मोरोची ग्रामपंचायत येथे ग्रामपंचायत अधिकारी (वर्ग ३) म्हणून कार्यरत आहेत. तक्रारदार हे एक नोंदणीकृत कंत्राटदार (ठेकेदार) असून त्यांनी मोरोची ग्रामपंचायत अंतर्गत काही विकासकामे पूर्ण केली होती. या कामांचे आधीचे थकीत बिल काढण्यासाठी आणि सध्या सुरू असलेल्या कामांचे प्रलंबित बिल मंजूर करण्यासाठी श्रीमती पूजा लोंढे यांनी तक्रारदाराकडे एकूण बिलाच्या ५ टक्के प्रमाणे लाचेची मागणी केली होती.
ही एकूण लाचेची रक्कम ४६,५०० रुपये इतकी ठरली होती. एसीबीचा सापळा आणि कारवाई तक्रारदाराने या लाचेच्या मागणीबाबत सोलापूर येथील लाच लुचपात प्रतिबंधक कार्यालयाकडे तक्रार नोंदवली होती. या तक्रारीची शहनिशा करण्यासाठी १० फेब्रुवारी २०२६ रोजी पडताळणी करण्यात आली, ज्यामध्ये लाचेची मागणी झाल्याचे निष्पन्न झाले. त्यानंतर आज, १८ फेब्रुवारी २०२६ रोजी सापळा रचण्याचे नियोजन करण्यात आले.लाचेच्या एकूण रकमेपैकी पहिला हप्ता म्हणून २६,५०० रुपये स्वीकारण्याचे आरोपीने मान्य केले होते. माळशिरस तालुक्यातील दहगाव-गुरसाळे रोड परिसरात हा सापळा लावला होता.
यावेळी तक्रारदाराकडून २६,५०० रुपयांची लाच स्वीकारताना एसीबीच्या पथकाने पूजा लोंढे यांना पंचांसमक्ष रंगेहात पकडले.गुन्हा दाखल करण्याची प्रक्रियाया प्रकरणी श्रीमती पूजा बाबासाहेब लोंढे यांच्याविरुद्ध नातेपुते पोलीस ठाणे, सोलापूर ग्रामीण येथे ‘भ्रष्टाचार प्रतिबंधक अधिनियम, कलम ७’ अन्वये गुन्हा दाखल करण्याची प्रक्रिया सुरू आहे.
ही कारवाई पुणे एसीबीचे पोलीस अधीक्षक शिरीष सरदेशपांडे, अप्पर पोलीस अधीक्षक अजित पाटील आणि सोलापूर एसीबीचे पोलीस उपअधीक्षक प्रशांत चौगुले, पोलीस निरीक्षक रवींद्र लांभाते, शैलेश चंद्रकांत पवार, पोलीस हवालदार सलीम मुल्ला, स्वामीराव जाधव, महिला पोलीस शिपाई प्रियांका गायकवाड आणि चालक राहुल गायकवाड. यांच्या मार्गदर्शनाखाली ही कारवाई करण्यात आली.
नागरिकांना आवाहन” : कोणत्याही शासकीय कामासाठी लोकसेवक किंवा त्यांच्या वतीने कोणीही खासगी व्यक्ती (एजेंट) कायदेशीर फी व्यतिरिक्त लाचेची मागणी करत असेल, तर नागरिकांनी घाबरून न जाता तातडीने लाचलुचपत प्रतिबंधक विभाग, सोलापूर यांच्याशी संपर्क साधावा,” असे आवाहन पोलीस उपअधीक्षक श प्रशांत चौगुले यांनी केले आहे.
संपर्क माहिती: पत्ता: पोलीस उपअधीक्षक, अँटी करप्शन ब्युरो, श्री छत्रपती शिवाजी महाराज रंगभवन चौक, सोलापूर.
टोल फ्री क्रमांक: १०६४
व्हॉट्सॲप क्रमांक: ९४०४००९०६४ *
वेबसाइट: www.acbmaharashtra.gov.in
