महापालिका आयुक्त डॉ. सचिन ओम्बासे यांनी काढले कारवाईचे आदेश
सोलापूर : महापालिका आरोग्य विभागातील क्ष-किरण तंत्रज्ञ (एक्स-रे टेक्निशियन ) गुरुप्रसाद इनामदार यांच्यावर निलंबनाची कारवाई करण्यात आली आहे. महापालिका आयुक्त डॉ. सचिन ओम्बासे यांनी आज कारवाईचे आदेश काढले आहेत.महापालिकेच्या रामवाडी यु.पी.एस.सी. केंद्रामध्ये उपचारासाठी येणाऱ्या रुग्णांचे क्ष-किरणयंत्राद्वारे तपासणी करुन त्याचा अहवाल देण्याच्या कामकाजाची जबाबदारी गुरुप्रसाद इनामदार यांच्यावर सोपविण्यात आली होती.
दि.२६ नोव्हेंबर २०२५ रोजी रामवाडी यु.पी.एस.सी. केंद्राकडे एक महिला रुग्ण क्ष-किरण तपासणीसाठी आली असता, क्ष-किरण तंत्रज्ञ गुरुप्रसाद इनामदार यांनी गैरवर्तन केले. तशी लेखी तक्रार केलेली असून, आरोग्य अधिकारी यांनी तक्रारीच्या अनुषंगाने नियंत्रण अधिकारी यांच्या निर्दशनास आणले आहे. ही बाब गंभीर स्वरुपाची व कार्यालयोन शिस्तीस बाधा पोहोचविणारी असून यामुळे जनमाणसांत मनपाची प्रतिमा मलिन झालेली आहे. गैरवर्तनामुळे कार्यालयीन शिस्तीचा तसेच महाराष्ट्र नागरी सेवा (वर्तणूक) १९७९ नियम ३ (१) मधील (एक ते दोन) च्या तरतुदीचा भंग झालेला आहे. त्यास सर्वस्वी गुरुप्रसाद इनामदार हेच जबाबदार आहे. त्यांच्यावर शिस्तभंगाची कारवाई करण्याचे प्रस्तावित असून, शिस्तभंगाची कारवाईस बाधा येऊ नये म्हणून, महाराष्ट्र नागरी सेवा (शिस्त व अपिल) नियम १९७९ मधील नियम ४ (१) (अ) नुसार त्यांना निलंबनाधिन ठेवणे आवश्यक आहे.
महाराष्ट्र नागरी सेवा (शिस्त व अपील) नियम १९७९ च्या नियम ४ (१) (अ) अन्वये प्रदान करण्यात आलेल्या शक्तीचा वापर करुन क्ष-किरण तंत्रज्ञ गुरुप्रसाद इनामदार यांना दि.२ डिसेंबर २०२५ च्या कार्यालयीन वेळेनंतर सेवेतून निलंबित करण्यात आले आहे. हा आदेश अंमलात असेपर्यंत गुरुप्रसाद इनामदार यांचे मुख्यालय सोलापूर शहर हे राहील व त्यांनी मनपा उपायुक्त तथा आरोग्य विभाग नियंत्रण अधिकारी यांच्या पूर्व संमतीशिवाय मुख्यालय सोडता कामा नये, असे महापालिका आयुक्त डॉ. सचिन ओम्बासे यांनी आदेशात म्हटले आहे.
