सोलापूर: सोलापूर जिल्ह्यातील सर्व सार्वजनिक व खाजगी क्षेत्रातील आस्थापनांनी त्यांच्या कर्मचाऱ्यांची माहिती (पुरुष/स्त्री/एकूण) त्रैमासिक विवरणपत्र ई.आर-1 च्या माध्यमातून स्थानिक सेवायोजन कार्यालयास ऑनलाईन सादर करणे कायद्याने बंधनकारक आहे, असे आवाहन सहायक आयुक्त संगीता खंदारे यांनी केले आहे.
सेवायोजन क्षेत्रातील ही माहिती योजनाबद्ध आर्थिक विकासासाठी विविध प्रकल्पांची आखणी व अंमलबजावणी, तसेच आवश्यक मनुष्यबळाचा अंदाज घेण्यासाठी अत्यंत उपयुक्त ठरते. ही सांख्यिकी माहिती महाराष्ट्र शासन व केंद्र शासनाच्या श्रम मंत्रालय, नवी दिल्ली यांच्याकडे दर तिमाहीस पाठविली जाते.
सदर विवरणपत्र https://rojgar.mahaswayam.gov.in या अधिकृत वेबपोर्टलवर ३१ ऑक्टोबर २०२५ पर्यंत सादर करणे आवश्यक आहे. यासाठी प्रत्येक आस्थापनास यापूर्वीच युजर आयडी व पासवर्ड प्रदान करण्यात आले आहेत, त्याचा वापर करून विवरणपत्र भरावे.
अधिक माहितीसाठी जिल्हा कौशल्य विकास रोजगार व उद्योजकता मार्गदर्शन केंद्र, नॉर्थकोट, पार्क चौक, सोलापूर (दूरध्वनी क्रमांक – 0217-2992956) येथे संपर्क साधावा, असेही आवाहन करण्यात आले आहे.
