सोलापूर: महात्मा ज्योतिबा फुले जन आरोग्य योजनेअंतर्गत मोफत उपचार मिळणे बंधनकारक असताना, रुग्णाच्या शस्त्रक्रियेसाठी लाचेची मागणी करणाऱ्या मंगळवेढा येथील मल्टिस्पेशालिटी हॉस्पिटलमधील खाजगी डॉक्टर आणि ‘आरोग्य मित्रा’वर गुन्हा दाखल करण्यात आला आहे.
तक्रारदार यांच्या ७२ वर्षीय आईचा पाय घसरून पडल्याने त्यांना मंगळवेढा येथील मल्टिस्पेशालिटी हॉस्पिटलमध्ये उपचारासाठी दाखल करण्यात आले होते. डॉ. अरुणकुमार महिंद्रकर यांनी शस्त्रक्रियेची गरज असल्याचे सांगितले. तक्रारदाराने ही शस्त्रक्रिया शासकीय योजनेतून (महात्मा ज्योतिबा फुले जन आरोग्य योजना) करण्याची विनंती केली. उपचार मोफत मिळणे बंधनकारक असतानाही, डॉ. महिंद्रकर यांनी सुरुवातीला १६,००० रुपयांची मागणी केली आणि त्यापैकी ६,००० रुपये घेतले. शस्त्रक्रिया पूर्ण झाल्यावर डिस्चार्ज देण्याच्या बदल्यात उर्वरित १०,००० रुपयांची पुन्हा मागणी करण्यात आली. तडजोडीअंती ५,००० रुपये लाचेची मागणी करण्यात आली
याप्रकरणी मंगळवेढा पोलीस ठाण्यात भ्रष्टाचार प्रतिबंधक कायदा कलम ७ व १२ प्रमाणे गुन्हा नोंदवण्यात आला आहे. आरोपींमध्ये डॉ. अरुणकुमार महिंद्रकर (वय अंदाजे ४५ वर्षे) आणि आरोग्य मित्र सोमनाथ इंगळे (वय अंदाजे ३८ वर्षे) यांचा समावेश आहे. ही कारवाई लाचलुचपत प्रतिबंधक विभाग, पुणे परिक्षेत्र आणि सोलापूर पथकाने केली आहे
कोणताही लोकसेवक, सरकारी कर्मचारी किंवा त्यांच्यावतीने काम करणारा खाजगी इसम (एजंट) कोणत्याही शासकीय कामासाठी लाचेची मागणी करत असल्यास, नागरिकांनी लाचलुचपत प्रतिबंधक विभागाच्या १०६४ या टोल-फ्री क्रमांकावर संपर्क साधावा, असे आवाहन पोलीस उपअधीक्षक प्रशांत चौगुले यांनी केले आहे
