नागरिकांच्या तक्रारींची तत्काळ दखल; अतिरिक्त आयुक्त वीणा पवार यांना निवेदन, तातडीने स्वच्छतेचे आश्वासन
सोलापूर, : शहराचे श्रद्धास्थान असलेल्या श्री सिद्धेश्वर मंदिर परिसरातील गणपती घाट आणि सिद्धेश्वर तलावाच्या काठावरील अस्वच्छतेचा प्रश्न पुन्हा एकदा ऐरणीवर आला आहे. सकाळ-संध्याकाळ फिरण्यासाठी येणारे नागरिक, भाविक आणि पर्यटकांची या परिसरात नियमित वर्दळ असते. मात्र, गणपती विसर्जनाच्या ठिकाणी असलेल्या अस्वच्छतेमुळे परिसराच्या स्वच्छतेबाबत नागरिकांनी नाराजी व्यक्त केली आहे. या समस्येची दखल घेत नगरसेवक सात्विक बडवे यांनी थेट महापालिका प्रशासनाकडे धाव घेत स्वच्छतेची मागणी केली आहे.
सोलापूरचे ग्रामदैवत श्री सिद्धेश्वर महाराज यांच्या मंदिर परिसराला धार्मिक आणि ऐतिहासिक महत्त्व आहे. शहरातील अनेक नागरिक दररोज सकाळी आणि सायंकाळी सिद्धेश्वर तलाव परिसरात फेरफटका मारण्यासाठी येतात. तसेच गणपती घाट परिसरात भाविकांचीही वर्दळ असते. त्यामुळे या परिसरात नियमित स्वच्छता राखणे आवश्यक आहे. मात्र, गणपती विसर्जनाच्या ठिकाणच्या अस्वच्छतेकडे प्रशासनाने लक्ष द्यावे, अशी मागणी नागरिकांमधून होत आहे.
या पार्श्वभूमीवर काही जागरूक नागरिकांनी गणपती घाटावरील अस्वच्छतेची छायाचित्रे नगरसेवक सात्विक बडवे यांना पाठविली. परिसराची तातडीने स्वच्छता करून घेण्याची विनंतीही त्यांनी केली. नागरिकांच्या या तक्रारीची बडवे यांनी तत्काळ दखल घेत महापालिका प्रशासनाला लेखी पत्र देण्याचा निर्णय घेतला.
त्यानुसार नगरसेवक बडवे यांनी सोलापूर महानगरपालिकेच्या अतिरिक्त आयुक्त वीणा पवार यांना गणपती घाट आणि सिद्धेश्वर तलाव परिसरातील स्वच्छतेसंदर्भात निवेदन दिले. या परिसरात तातडीने स्वच्छता मोहीम राबवून नागरिक व भाविकांची गैरसोय दूर करावी, अशी मागणी त्यांनी केली.निवेदनाची दखल घेत अतिरिक्त आयुक्त वीणा पवार यांनी संबंधित ठिकाणची स्वच्छता लवकरात लवकर करून घेण्याचे आश्वासन दिले. त्यामुळे आता महापालिका प्रशासनाकडून प्रत्यक्ष स्वच्छतेची कार्यवाही कधी केली जाते, याकडे नागरिकांचे लक्ष लागले आहे.
शहराच्या धार्मिक आणि सांस्कृतिक ओळखीशी निगडित असलेल्या सिद्धेश्वर तलाव व गणपती घाट परिसरात केवळ प्रसंगानुरूप नव्हे, तर नियमित स्वच्छता राखण्याची आवश्यकता आहे. नागरिकांनी छायाचित्रांसह मांडलेल्या तक्रारीनंतर नगरसेवकांनी प्रशासनाकडे पाठपुरावा केला असला, तरी या समस्येवर कायमस्वरूपी उपाययोजना करण्याची अपेक्षा व्यक्त होत आहे.
