सोलापूर : शहर सोलापूर शहर गुन्हे शाखेने अंमली पदार्थांविरोधात केलेल्या धडाकेबाज कारवाईत तब्बल ९५० ग्रॅम मेफेड्रोन (एमडी) हा अंमली पदार्थ जप्त करण्यात आला असून, त्याची आंतरराष्ट्रीय बाजारातील किंमत सुमारे रु. १ कोटी ९० लाख इतकी आहे. या कारवाईत एकूण सुमारे रु. २ कोटींचा मुद्देमाल हस्तगत करण्यात आला आहे. पोलीस आयुक्त एम. राज कुमार, पोलीस उपायुक्त (मुख्यालय) तथा प्रभारी पोलीस आयुक्त गौहर हसन आणि गुन्हे शाखेच्या उपायुक्त डॉ. अश्विनी पाटील यांच्या मार्गदर्शनाखाली ही कारवाई करण्यात आली.
गुन्हे शाखेचे वरिष्ठ पोलीस निरीक्षक अरविंद माने यांच्या नेतृत्वाखालील पथकाने दि. १२ मे २०२६ रोजी सकाळी सोलापूर शहर परिसरात पेट्रोलिंगदरम्यान मिळालेल्या गोपनीय माहितीच्या आधारे मुस्लीम कब्रस्तान–VIP रोड परिसरात सापळा रचला. संशयित पांढऱ्या रंगाची ह्युंडाई व्हेन्यू (MH-13 ES-1411) कार थांबवून तपासणी केली असता त्यात एमडी पावडर आढळून आली.
या प्रकरणी रिझवान शब्बीर खान (वय २६) याला ताब्यात घेण्यात आले असून, तपासादरम्यान साहिल सिकंदर पिरजादे आणि अफजल मुर्शद यांचाही सहभाग उघड झाला आहे. संबंधित सर्व आरोपींविरुद्ध एम.डी. (एनडीपीएस) कायद्यान्वये गुन्हा दाखल करण्यात आला आहे. जप्त करण्यात आलेल्या मुद्देमालामध्ये ९५० ग्रॅम एमडी, तसेच सुमारे १० लाख रुपये किंमतीची कार यांचा समावेश आहे. आरोपींना न्यायालयाने ४ दिवसांची पोलीस कोठडी सुनावली आहे. या प्रकरणाचा पुढील तपास गुन्हे शाखेकडील पथकाकडून सुरू आहे.
