सोलापूर : विधान परिषदेच्या स्थानिक स्वराज्य संस्था मतदारसंघाच्या निवडणुकीची रणधुमाळी सुरू झाली असून, सोलापूर जिल्ह्यातील ‘आमदारकीची लॉटरी’ अखेर कुणाला लागणार याकडे संपूर्ण राजकीय वर्तुळाचे लक्ष लागले आहे. निवडणूक आयोगाने २५ मे ते २५ जून दरम्यान आचारसंहिता लागू केली असून, १८ जून रोजी मतदान होणार आहे. या निवडणुकीत सोलापूर जिल्ह्यातील महापालिका, जिल्हा परिषद, पंचायत समित्या, नगरपरिषद आणि नगरपंचायतीतील लोकप्रतिनिधी असे एकूण ६१६ मतदार मतदानाचा हक्क बजावणार आहेत. त्यामध्ये भाजपकडे स्पष्ट बहुमत असल्याने या निवडणुकीत भाजपचा उमेदवार विजयी होण्याची शक्यता अधिक मानली जात आहे. एकूण ६१६ मतदारांपैकी तब्बल ३१३ मतदार भाजपकडे असल्याने निवडणुकीत पक्षाची ताकद निर्णायक मानली जात आहे. त्यामुळे भाजपमध्ये उमेदवारीसाठी जोरदार रस्सीखेच सुरू झाली आहे.
‘हेवीवेट’ इच्छुक रिंगणात
भाजपकडे स्पष्ट वर्चस्व असल्यामुळे उमेदवारीसाठी इच्छुकांची मोठी गर्दी झाली आहे. माजी आमदार राम सातपुते, प्रशांत परिचारक, राजन पाटील, रणजितसिंह मोहिते पाटील, राजेंद्र राऊत तसेच भाजपचे माजी जिल्हाध्यक्ष शहाजीभाऊ पवार यांची नावे चर्चेत आहेत. भाजपचे वरिष्ठ नेते अखेर कोणाच्या नावावर शिक्कामोर्तब करतात, याची उत्सुकता जिल्हाभर शिगेला पोहोचली आहे.
या मतदारसंघातून निवडून आलेले दिग्गज
सोलापूर स्थानिक स्वराज्य संस्था मतदारसंघातून यापूर्वी इनुस शेख, सुभाष देशमुख, प्रशांत परिचारक, रणजितसिंह मोहिते पाटील आणि दीपक आबा साळुंखे यांनी विधान परिषदेवर प्रतिनिधित्व केले आहे. त्यामुळे या मतदारसंघाला जिल्ह्याच्या राजकारणात विशेष महत्त्व प्राप्त झाले आहे.
‘सुगीचे दिवस’ परतल्याची चर्चा
सोलापूर जिल्ह्यात यापूर्वी झालेल्या विधान परिषद निवडणुकांमध्ये मतदार असलेल्या नगरसेवक, जिल्हा परिषद सदस्य, पंचायत समिती सभापती आणि नगराध्यक्ष यांच्यासाठी ‘सुगीचे दिवस’ आल्याची चर्चा रंगली होती. यंदाही त्याच चर्चांना पुन्हा उधाण आले असून, राजकीय लॉबिंगला वेग आल्याचे चित्र आहे.
