सोलापूर – सोलापूर-पुणे महामार्गावर देवदर्शनासाठी निघालेल्या भाविकांच्या कारचा भीषण अपघात झाला. या महामार्गावर मोहोळ जवळील देवडी पाटीजवळ शनिवारी रात्री ही घटना घडली. अपघातात पाच भाविकांचा मृत्यू झाला असून एक महिला गंभीररित्या जखमी झाली आहे. संबंधित घटनेने परिसरात एकच खळबळ उडाली आहे. शनिवारी रात्री जवळपास 11 वाजण्याच्या सुमारास ही घटना घडली. पनवेल येथून अक्कलकोटला देवदर्शनासाठी निघालेल्या भाविकांची कार रस्त्याच्या कडेला असलेल्या झाडावर जोरात आदळली. कार चालकाचा ताबा सुटल्याने कार झाडाला धडकली आणि ही धडक इतकी भीषण होती की यामध्ये कारचा अक्षरशः चेंदामेंदा झाला. या कारमध्ये एकूण सहा प्रवासी असून यात तीन पुरुष आणि तीन महिला होत्या.
या भीषण अपघाताची माहिती मिळताच, स्थानिक नागरिक आणि पोलिसांनी तातडीने घटनास्थळी धाव घेतली. मोहोळ पोलीस ठाण्याचे अधिकारी व कर्मचारी तत्काळ घटनास्थळी दाखल होऊन आवश्यक कार्यवाही करण्यात आली. मात्र, कारमधील पाच जणांचा जागीच मृत्यू झाला होता आणि त्यातील एक महिला गंभीररित्या जखमी होती. संबंधित महिलेला तातडीने मोहोळ येथील शासकीय रुग्णालयात दाखल करण्यात आले असून तिच्यावर उपचार सुरू असल्याचे सांगण्यात येत आहे.
