विशेष पोलीस महानिरीक्षक सुनील फुलारी यांच्या हस्ते फॉरेन्सिक व्हॅनचे लोकार्पण आणि वार्षिक आढावा बैठक संपन्न
सोलापूर, २७ फेब्रुवारी २०२६:सोलापूर ग्रामीण पोलीस दलाच्या कार्यक्षमतेत वाढ करण्यासाठी आणि गुन्ह्यांच्या तपासाला तांत्रिक बळ देण्यासाठी शासनाकडून प्राप्त झालेल्या चार नवीन फॉरेन्सिक व्हॅनचे (Forensic Van) लोकार्पण आज करण्यात आले. कोल्हापूर परिक्षेत्राचे विशेष पोलीस महानिरीक्षक सुनील फुलारी आणि सोलापूर शहराचे पोलीस आयुक्त एम. रामकुमार यांच्या शुभहस्ते हे सेवार्पण पार पडले.
आढावा बैठक आणि मार्गदर्शनपोलीस मुख्यालय, सोलापूर ग्रामीण येथील ‘संवाद हॉल’ मध्ये आयोजित बैठकीत विशेष पोलीस महानिरीक्षक सुनील फुलारी यांनी सोलापूर ग्रामीणमधील मागील वर्षातील गुन्ह्यांचा सविस्तर आढावा घेतला. जिल्हयातील कायदा व सुव्यवस्थेची परिस्थिती हाताळण्याबाबत आणि प्रलंबित गुन्ह्यांच्या तपासाबाबत त्यांनी उपस्थितांना मोलाचे मार्गदर्शन केले.या कार्यक्रमाचे मुख्य आकर्षण असलेल्या नवीन फॉरेन्सिक व्हॅन्समुळे आता गुन्ह्याच्या घटनास्थळावरील महत्त्वाचे पुरावे शास्त्रीय पद्धतीने गोळा करणे अधिक सोपे होणार आहे.
पुरावे मूळ स्वरूपात जतन करून तपासणीसाठी पाठवता येणार असल्याने, न्यायालयात गुन्हे सिद्ध होण्याचे (Conviction Rate) प्रमाण वाढेल आणि नागरिकांना जलद न्याय मिळेल, असा विश्वास मान्यवरांनी व्यक्त केला. याच प्रसंगी सोलापूर आपत्ती व्यवस्थापन विभागाकडून नैसर्गिक आपत्तीच्या काळात उपयुक्त ठरणारे ‘आपत्ती व्यवस्थापन किट’ देखील पोलीस विभागाला सुपूर्द करण्यात आले.
या कार्यक्रमासाठी सोलापूर ग्रामीणचे पोलीस अधीक्षक अतुल कुलकर्णी, अपर पोलीस अधीक्षक. प्रीतमकुमार यावलकर, सर्व सहाय्यक पोलीस अधीक्षक, उपविभागीय पोलीस अधिकारी, विविध शाखांचे प्रभारी अधिकारी आणि पोलीस कर्मचारी मोठ्या संख्येने उपस्थित होते.
