पालकमंत्री जयकुमार गोरे सोलापुरात; अध्यक्षपदाच्या अंतिम निर्णयाची शक्यता
सोलापूर, भारतीय जनता पक्षकडून सोलापूर जिल्हा परिषद अध्यक्ष-उपाध्यक्ष निवडीबाबत अद्यापही अधिकृत घोषणा करण्यात आलेली नाही. अध्यक्षपदासाठी आघाडीवर असलेल्या शांभवी कल्याणशेट्टी यांनी आपण इच्छुक नसल्याचे स्पष्ट केल्यानंतर स्पर्धा अधिकच रंगली आहे. जिल्हा परिषद अध्यक्षपदाच्या शर्यतीत अक्कलकोट व दक्षिण सोलापूर तालुक्यांत विभागलेल्या वळसंग जिल्हा परिषद गटातील सदस्य रामप्पा चिवडशेट्टी यांचे नाव आता पुढे येत आहे.
पालकमंत्री जयकुमार गोरे सोलापूर दौऱ्यावर असून, संबंधित तालुक्यांतील भाजप लोकप्रतिनिधींसोबत होणाऱ्या बैठकीत जिल्हा परिषदेच्या आगामी पदाधिकाऱ्यांबाबत अंतिम शिक्कामोर्तब होण्याची शक्यता वर्तवली जात आहे.भाजपकडे ज्या विधानसभा मतदारसंघात आमदार नाहीत, अशा तालुक्याला पुढील अडीच वर्षांसाठी अध्यक्षपद देण्याचे धोरण अवलंबले जाऊ शकते, अशी चर्चा पक्षवर्तुळात सुरू आहे. दरम्यान, आ. सुभाष देशमुख यांची नाराजी दूर करून त्यांचे आणि आ. सचिन कल्याणशेट्टी यांच्यात समन्वय साधण्यासाठी भाजपकडे रामप्पा चिवडशेट्टी यांच्या रूपाने अध्यक्षपदाचा सक्षम पर्याय असल्याचा दावा राजकीय तज्ज्ञांकडून केला जात आहे. सोलापूर जिल्हा परिषद अध्यक्षपदाचा निर्णय आता कोणाच्या पारड्यात पडतो, याकडे संपूर्ण जिल्ह्याचे लक्ष लागले आहे
आमदारकी-मंत्रीपदाच्या चर्चेमुळे सावध भूमिका
आगामी विधान परिषद निवडणुका तसेच राज्यपाल कोट्यातून आमदारकीच्या शक्यतांबाबत जिल्ह्यातील काही तालुकास्तरीय नेत्यांना आश्वासने देण्यात आल्याची चर्चा आहे. तसेच सरकारच्या उत्तरार्धात जिल्ह्यातील भाजप आमदाराला मंत्रीपद मिळण्याची शक्यता व्यक्त होत आहे.
या पार्श्वभूमीवर जिल्हा परिषद अध्यक्ष, उपाध्यक्ष व सभापती पदांसाठी इच्छुक असलेल्या नेत्यांनी सध्या सावध भूमिका घेतल्याचे दिसून येते. नेत्यांची आमदारकी किंवा संभाव्य मंत्रीपद हेच जिल्हा परिषदेतील भावी पदाधिकाऱ्यांसाठी अडसर ठरत असल्याची चर्चा भाजपच्या गोटात रंगली आहे.
