सोलापूर : जिल्ह्यातील दुष्काळी परिस्थितीच्या पार्श्वभूमीवर सोलापूर येथील कोळी समाज बांधवांनी यंदाची महर्षी वाल्मिकी जयंती मोठ्या डामडौलात साजरी न करता साध्या पद्धतीने साजरी करण्याचा निर्णय घेतला आहे.
उद्योजक गणेश कोळी यांच्या मार्गदर्शनाखाली महर्षी वाल्मिकी जयंती उत्सव समितीने हा निर्णय घेतला. यंदा उपक्रमांतर्गत गणेश कोळी यांच्या हस्ते महर्षी वाल्मिकी यांच्या मूर्तींचे वाटप करण्यात आले. सात रस्ता येथे मूर्तीची स्थापना करून विधिवत पूजा आणि आरती करण्यात आली. यावेळी गणेश कोळी आणि कपिल कोळी यांनी मार्गदर्शन केले. दुष्काळामुळे शेतकरी आणि सामान्य नागरिक अडचणीत असताना उत्सवावर मोठा खर्च करणे योग्य नाही.
त्याऐवजी हा निधी गरजू आणि होतकरू विद्यार्थ्यांच्या शिक्षणासाठी वापरावा. विद्यार्थ्यांना शैक्षणिक साहित्य, शुल्कासाठी मदत आणि मार्गदर्शन करण्यासाठी समाजबांधवांनी पुढाकार घ्यावा, असे आवाहन यावेळी करण्यात आले. या प्रसंगी गणेश कोळी, संजयकुमार कोळी, कपिल कोळी, भारती कोळी, सुधाकर सुसलादी, नागेश कोळी, नगरसेवक दीपक जमादार , दत्ता कलाडगी, अप्पू शेडगुळ आदी समाजबांधव उपस्थित होते.
