मालमत्ता लपवून शासकीय नोकरीचा प्रयत्न पडला महागात
सोलापूर : घरात कोणीही कमवता नाही, महाराष्ट्रात कोठेही जंगम मालमत्ता नाही अशी खोटी माहिती देऊन पतीची अनुकंपाखाली नोकरी मिळवल्याप्रकरणी महिलेवर सदर बझार पोलिस ठाण्यात गुन्हा दाखल झाला आहे.वैशाली विश्वास जाधव (विद्या नगर, शेळगी रोड सोलापूर) असे गुन्हा दाखल झालेल्या महिलेचे नाव आहे.
वैशाली जाधव यांचे पती विश्वास रामकृष्ण जाधव हे महावितरण कंपनीत वरिष्ठ तंत्रज्ञ म्हणून कार्यरत होते. २३ जानेवारी २०२४ रोजी त्यांचा मृत्यू झाला होता. मृत्यूनंतर त्यांची पत्नी वैशाली विश्वास जाधव यांनी वारसदार असल्याचे सांगून महाराष्ट्र राज्य वीज वितरण कंपनी मर्या. चे मुख्य व्यवस्थापक मानव संसाधन विभाग मुख्य कार्यालय मुंबई यांच्याकडे अनुकंपाखाली नोकरीकरिता अर्ज केला होता. अर्जासोबत त्यांनी दोन प्रतिज्ञापत्र दिले होते, त्यावर घरात कोणी कमवता नाही. शासकीय, निमशासकीय व खासगी कंपनीत नोकरीस नाही. शिवाय पतीची महाराष्ट्रात कोठेही स्थावर मालमत्ता नाही असे नमूद केले होते.
मात्र, अशी खोटी माहिती दिल्याची तक्रार मदला भरत पाटील यांनी दिली होती. जिल्हाधिकारी यांनी दिलेल्या आदेशानुसार खोटी माहिती दिल्याप्रकरणी वैशाली जाधव यांच्यावर गुन्हा दाखल झाला.
