नगरसेवक दीपक जमादार यांच्या कामाचे केले कौतुक
सोलापूर: सोलापूर महानगरपालिका हद्दीतील जुळे सोलापूर भागाचा झपाट्याने विस्तार होत असताना, प्रभाग क्रमांक २६ ब मधील रोहिणी नगर येथील नागरिकांची अनेक दिवसांची प्रलंबित मागणी पूर्ण झाली आहे. माजी सहकार मंत्री तथा आमदार सुभाष देशमुख यांच्या मार्गदर्शनाखाली आणि सिद्धेश्वर कृषी उत्पन्न बाजार समितीचे संचालक मनिष देशमुख यांच्या सूचनेनुसार, रोहिणी नगर भाग १, २, ३, द्वारका नगर , उद्धव नगर भाग १, २, ,येथील अंतर्गत रस्त्यांच्या डांबरीकरण व मजबुतीकरणाच्या कामाला प्रत्यक्ष सुरुवात करण्यात आली आहे.
या कामाची नुकतीच प्रभाग क्रमांक २६ ब चे नगरसेवक दीपक जमादार यांनी प्रत्यक्ष घटनास्थळी भेट देऊन पाहणी केली. यावेळी त्यांनी कामाच्या दर्जाबाबत आणि वेळेत पूर्ण करण्याबाबत उपस्थित महापालिका अधिकारी व ठेकेदारांना आवश्यक त्या सूचना दिल्या. गेल्या काही काळापासून या भागातील रस्त्यांच्या दुरवस्थेमुळे नागरिकांना, विशेषतः ज्येष्ठ नागरिक आणि शालेय विद्यार्थ्यांना मोठा त्रास सहन करावा लागत होता. आता प्रत्यक्ष कामाला सुरुवात झाल्यामुळे परिसरातील रहिवाशांनी समाधान व्यक्त केले असून, आमदार सुभाष देशमुख व मनिषभैया देशमुख यांचे आभार मानले आहेत.
यावेळी बोलताना नगरसेवक दीपक जमादार म्हणाले की, “प्रभागाचा सर्वांगीण विकास करणे हे आमचे ध्येय आहे. आमदार सुभाष देशमुख यांच्या माध्यमातून प्रभागातील मूलभूत सोयीसुविधांसाठी मोठ्या प्रमाणावर निधी उपलब्ध झाला असून, त्याद्वारे उर्वरित कामेही प्राधान्यक्रमाने पूर्ण केली जातील.” या प्रसंगी परिसरातील प्रतिष्ठित नागरिक, महापालिकेचे संबंधित अधिकारी आणि कार्यकर्ते मोठ्या संख्येने उपस्थित होते.
