सोलापूर : शहरातील स्वास्तिक नागरी सहकारी पतसंस्थेच्या नव्या शाखेचा उद्घाटन सोहळा उत्साहपूर्ण वातावरणात पार पडला. मराठी चित्रपट व दूरदर्शन क्षेत्रातील लोकप्रिय अभिनेत्री श्रेया बुगडे यांच्या हस्ते या शाखेचे उद्घाटन करण्यात आले. या प्रसंगी विविध क्षेत्रातील मान्यवर, पतसंस्थेचे पदाधिकारी, सभासद आणि नागरिक मोठ्या संख्येने उपस्थित होते उद्घाटन समारंभात बोलताना श्रेया बुगडे यांनी सहकार क्षेत्रातील पतसंस्थांची भूमिका अत्यंत महत्त्वाची असल्याचे अधोरेखित केले. “सामान्य नागरिकांना आर्थिकदृष्ट्या सक्षम बनवण्यासाठी अशा संस्थांची गरज आहे. स्वास्तिक पतसंस्था स्थानिक पातळीवर नागरिकांना सुलभ आणि विश्वासार्ह सेवा देत आहे, ही अभिमानास्पद बाब आहे,” असे त्या म्हणाल्या.
कार्यक्रमादरम्यान उपस्थित मान्यवरांचा सत्कार करण्यात आला. तसेच संस्थेच्या वतीने ठेवीदार व ग्राहकांसाठी राबविण्यात येणाऱ्या विविध बचत व कर्ज योजनांची माहिती देण्यात आली. पतसंस्थेच्या अधिकाऱ्यांनी संस्थेच्या आतापर्यंतच्या प्रवासाचा आढावा घेत, भविष्यातील विस्तार योजनाही स्पष्ट केल्या. नव्या शाखेमुळे परिसरातील नागरिकांना बचत खाते, विविध कर्ज सुविधा, ठेवी योजनांसह इतर बँकिंग सेवा अधिक सुलभ व जलद पद्धतीने उपलब्ध होणार आहेत. डिजिटल व्यवहार, ग्राहकाभिमुख सेवा आणि पारदर्शक व्यवहारपद्धती यांवर भर देत संस्थेने ग्राहकांचा विश्वास संपादन केला आहे.
या शाखेच्या माध्यमातून स्थानिक व्यावसायिक, लघुउद्योग तसेच सर्वसामान्य नागरिकांना आर्थिक मदत मिळून त्यांच्या प्रगतीला चालना मिळणार असल्याची अपेक्षा व्यक्त करण्यात येत आहे. उद्घाटन सोहळ्यानंतर परिसरात उत्साहाचे वातावरण निर्माण झाले असून, नागरिकांनी मोठ्या प्रमाणात या सेवांचा लाभ घ्यावा, असे आवाहन पतसंस्थेच्या वतीने करण्यात आले आहे. यावेळी स्वस्तिक पतसंस्थेची संचालक मंडळ, सभासद, पदाधिकारी,मित्रपरिवार,उद्योजक मोठ्या संख्येने उपस्थित होते.
