सोलापूर, : राष्ट्रीय पल्स पोलिओ लसीकरण मोहिमेंतर्गत रविवारी (दि. २८) सोलापूर जिल्ह्यात ४ लाख २१५ बालकांना पोलिओची मात्रा देण्यात आली. अपेक्षित ४ लाख ३६ हजार ५९८ बालकांपैकी ९१.६६ टक्के बालकांचे लसीकरण पूर्ण झाल्याची माहिती जिल्हा आरोग्य अधिकारी डॉ. सतीश कोपूरवाड यांनी दिली. ग्रामीण भागात अपेक्षित बालकांपैकी ९१.६६ टक्के लसीकरण पूर्ण झाले. तर जिल्हा शल्यचिकित्सकांच्या कार्यक्षेत्रातील शहरी भागात ४३ हजार ६६७ पैकी ३७ हजार ७७१ (८६.५० टक्के) आणि सोलापूर महानगरपालिका हद्दीत १ लाख ६ हजार ४३ पैकी ९३ हजार ३४४ (८८.०२ टक्के) बालकांना पोलिओ डोस देण्यात आला.
या मोहिमेसाठी ग्रामीण, शहरी व महापालिका क्षेत्रात मिळून ६ हजार ५१३ लसीकरण बूथ उभारण्यात आले होते. ७ हजार २२२ कर्मचारी आणि वैद्यकीय अधिकारी, तालुका आरोग्य अधिकारी तसेच जिल्हा व तालुकास्तरीय पर्यवेक्षकांनी मोहिमेचे नियोजन व अंमलबजावणी केली. बसस्थानके, रेल्वे स्थानके, बाजारपेठा, विटभट्ट्या, साखर कारखाने, यात्रा व लग्न समारंभांच्या ठिकाणी विशेष लसीकरण केंद्रे उभारण्यात आली होती. तसेच भटक्या व ऊसतोड कामगारांच्या वसाहतींमध्ये मोबाईल पथकांमार्फत लसीकरण करण्यात आले.
वृत्तपत्रे, इलेक्ट्रॉनिक माध्यमे, आशा स्वयंसेविका व अंगणवाडी सेविकांच्या गृहभेटींद्वारे जनजागृती करण्यात आल्याने मोहिमेला चांगला प्रतिसाद मिळाल्याचे डॉ. कोपूरवाड यांनी सांगितले. उर्वरित बालकांचे लसीकरण ग्रामीण भागात तीन दिवस आणि शहरी भागात पाच दिवस गृहभेटीद्वारे पूर्ण करण्यात येणार असल्याचे त्यांनी स्पष्ट केले.
