गावठी पिस्तूल, काडतुसे अन् साडेपाच लाखांची रोकड जप्त ; एमआयडीसी पोलिसांची कारवाई

सोलापूर : एमआयडीसी पोलिसांच्या गुन्हे प्रकटीकरण पथकाने मंगळवारी रात्री केलेल्या धडक कारवाईत गावठी पिस्तूल, पाच जिवंत काडतुसे आणि तब्बल साडेपाच लाखांची रोकड जप्त करत एका तरुणाला अटक केली. या कारवाईमुळे बेकायदेशीर शस्त्र बाळगणाऱ्या टोळीच्या हालचालींवर पोलिसांनी मोठा आळा घातला असून, फरार साथीदाराचा शोध सुरू आहे. गोपनीय माहितीच्या आधारे गुन्हे प्रकटीकरण पथकाने नितीन नगर परिसरातील कोंड्याल शाळेमागील बंद पडलेल्या फरसाण कारखान्याजवळ सापळा रचला.

संशयास्पदरीत्या फिरणाऱ्या रोहित रघुनाथ अहिरे (वय २०, रा. सोलापूर) याची झडती घेतली असता त्याच्या स्पोर्ट्स बॅगमधून एक देशी बनावटीचे गावठी पिस्तूल, पाच जिवंत काडतुसे आणि ५ लाख ५० हजार रुपयांची रोख रक्कम आढळून आली. पोलिसांनी एकूण ५ लाख ८७ हजार ५०० रुपयांचा मुद्देमाल जप्त केला.प्राथमिक चौकशीत जप्त केलेला मुद्देमाल त्याचा मित्र प्रदीप हुसेनी गायकवाड याने लपविण्यासाठी दिल्याची माहिती समोर आली. त्यानुसार एमआयडीसी पोलीस ठाण्यात शस्त्र अधिनियमांतर्गत गुन्हा दाखल करण्यात आला असून, फरार प्रदीप गायकवाडचा शोध सुरू आहे. अटक करण्यात आलेल्या रोहितविरुद्ध यापूर्वीही गंभीर स्वरूपाचे गुन्हे नोंद असल्याचे पोलिसांनी सांगितले.

दरम्यान, तपासादरम्यान आणखी धक्कादायक माहिती समोर आली आहे. फरार प्रदीप गायकवाडच्या वडिलांवर महाराष्ट्र, कर्नाटक आणि आंध्र प्रदेश या तीन राज्यांत मालमत्ता व शरीराविरुद्धच्या गुन्ह्यांची नोंद असल्याची माहिती पोलिसांना मिळाली असून, या आंतरराज्य गुन्हेगारी नेटवर्कची माहिती संकलित केली जात आहे. या पार्श्वभूमीवर पोलिसांनी तपासाची व्याप्ती वाढवली असून, या प्रकरणामागील आर्थिक आणि गुन्हेगारी संबंधांचीही चौकशी सुरू आहे.ही कारवाई वरिष्ठ पोलीस निरीक्षक एस. बिराजदार, पोलीस निरीक्षक (गुन्हे) संगीता पाटील, पोलीस उपनिरीक्षक अल्फाज शेख आणि त्यांच्या पथकाने केली.