आरोग्य उपकेंद्रे नियमित चालवा; आरोग्य समितीचे स्पष्ट निर्देश

सोलापूर, : ग्रामीण भागातील नागरिकांना अधिक सक्षम, सुलभ आणि गुणवत्तापूर्ण आरोग्य सेवा उपलब्ध करून देण्याच्या उद्देशाने सोलापूर जिल्हा परिषद आरोग्य समितीची बैठक मंगळवेढा तालुक्यातील आंधळगाव प्राथमिक आरोग्य केंद्रात शिक्षण व आरोग्य सभापती चेतनसिंह केदार-सावंत यांच्या अध्यक्षतेखाली पार पडली. बैठकीत तालुक्यातील प्राथमिक आरोग्य केंद्रांच्या कामकाजाचा सविस्तर आढावा घेण्यात आला.

यावेळी आरोग्य कर्मचाऱ्यांच्या अडचणी, रिक्त पदे, उपलब्ध सुविधा आणि सेवा अधिक प्रभावी करण्यासाठी आवश्यक उपाययोजनांवर चर्चा करण्यात आली. प्रत्येक प्राथमिक आरोग्य केंद्र व आरोग्य उपकेंद्र नियमितपणे कार्यरत राहून नागरिकांना दर्जेदार आरोग्य सेवा मिळाली पाहिजे, असे निर्देश सभापती केदार-सावंत यांनी दिले. ग्रामीण भागातील गर्भवती महिलांना वेळेत सोनोग्राफी सुविधा उपलब्ध व्हावी यासाठी संबंधित परिसरातील मान्यताप्राप्त सोनोग्राफी केंद्रांशी समन्वय (टाय-अप) करण्याचे निर्देशही बैठकीत देण्यात आले. तसेच आरोग्य विभागाच्या विविध योजना नागरिकांना एकाच ठिकाणी उपलब्ध करून देण्यासाठी प्रभावी नियोजन करण्याच्या सूचना तालुका आरोग्य अधिकाऱ्यांना करण्यात आल्या.

आषाढी वारीदरम्यान वारकऱ्यांना उत्कृष्ट आरोग्य सेवा देण्यासाठी आरोग्य विभागातील अधिकारी व कर्मचाऱ्यांनी केलेल्या उल्लेखनीय कार्याचे सभेत विशेष कौतुक करण्यात आले. त्यांच्या कार्याबद्दल अभिनंदनाचा ठरावही एकमताने मंजूर करण्यात आला. बैठकीस जिल्हा परिषद सदस्य व्यंकटराव भालके, सविताताई कोकाटे, सोनालीताई कडते, करुणाताई शिवशरण, प्रशांत कडते, जनार्दन शिवशरण, जिल्हा वैद्यकीय अधिकारी डॉ. सतीश कोपुरवाड, सर्व तालुका वैद्यकीय अधिकारी तसेच जिल्हा आरोग्य विभागाचे अधिकारी उपस्थित होते.

बैठकीत ग्रामीण आरोग्य सेवा अधिक सक्षम, परिणामकारक आणि लोकाभिमुख करण्यासाठी विविध महत्त्वपूर्ण निर्णय घेण्यात आल्याची माहिती प्रशासनाकडून देण्यात आली.