संगीत प्रतिभा महोत्सवा’ची रंगतदार सांगता; सुंद्री-व्हायोलिन जुगलबंदीला उत्स्फूर्त दाद
सोलापूर : सुंद्री वादनाचे सुरेल स्वर, शास्त्रीय गायनाची मैफल, व्हायोलिनचे माधुर्य आणि भरतनाट्यम-कथकच्या बहारदार सादरीकरणाने सोलापूरकर रसिकांना मंत्रमुग्ध केले. लोकमान्य टिळक सभागृह (ॲम्फी थिएटर) येथे रविवारी झालेल्या ‘संगीत प्रतिभा महोत्सवा’ची गायन, वादन आणि नृत्याच्या त्रिवेणी संगमाने रंगतदार सांगता झाली.
दुर्मिळ सुंद्री वाद्य कला अकादमी, सांस्कृतिक मंत्रालय (भारत सरकार) आणि सह्याद्री दूरदर्शन यांच्या संयुक्त विद्यमाने तसेच पंडित भिमण्णा जाधव यांच्या आयोजनातून महोत्सव पार पडला. महापालिकेच्या सहाय्यक आयुक्त वीणा पवार, माजी नगरसेवक गुरुशांत धुतरगावकर, सोलापूर आकाशवाणीचे सहाय्यक संचालक सोमशेखर पाटील, श्रीकांत येळेगावकर, सह्याद्री वाहिनीचे महेंद्र जगताप, गणेश नास्ते व ऋषिकेश नागावकर यांच्या उपस्थितीत उद्घाटन झाले.
महोत्सवाचा प्रारंभ जाधव घराण्याच्या पाचव्या पिढीतील बालकलाकार कलाश्री जाधव यांच्या सुंद्री वादनाने झाला. त्यांनी ‘राग दुर्गा’मध्ये मींड, ताना व तिहाई सादर करत ‘रघुपती राघव राजाराम’ हे भजन पेश केले. त्यांना अजय यंगल यांनी तबलासाथ दिली. त्यानंतर रमा कुलकर्णी यांनी ‘राग पुरिया कल्याण’ सादर करून आपल्या गायकीची छाप पाडली. त्यांना नितीन दिवाकर यांनी तबला, तर राजकुमार सावळगी यांनी हार्मोनियमची साथ दिली जाधव घराण्यातील बालकलाकार व्यंकटेशकुमार जाधव आणि लंडनची शिष्यवृत्तीप्राप्त वेधा पोळ यांच्या सुंद्री-व्हायोलिन जुगलबंदीने महोत्सवात विशेष रंग भरला. ‘राग यमन’मधील स्वररचना, तान, गमक आणि सवाल-जवाबाच्या सादरीकरणाला रसिकांनी उत्स्फूर्त दाद दिली. त्यानंतर ‘माझे माहेर पंढरी’ या अभंगाने भक्तिरसाची अनुभूती दिली. पुण्याचे वेदांग जोशी यांनी तबल्याची साथ केली.
कोलकात्याच्या प्रसिद्ध ठुमरी गायिका पं. रोजी दत्ता यांनी दोन ठुमरी व दादरा सादर करत रसिकांची मने जिंकली. त्यांना जोथम कराळ यांनी तबला, तर ओंकार पाठक यांनी संवादिनीची साथ दिली. नृत्यविभागात एकता कांबळे यांच्या भरतनाट्यममधील भावमुद्रा, पदलालित्य आणि आकर्षक वेशभूषेने उपस्थितांचे लक्ष वेधले. कथक नृत्याच्या सादरीकरणात रूपक, एकताल आणि पंचम सवारीमधील लयकारी, तंत्रकारी व अदाकारीने कार्यक्रमाची रंगत आणखी वाढवली.
कार्यक्रमाचे सूत्रसंचालन साकव फाउंडेशनचे डॉ. जगदीश पाटील यांनी केले. महोत्सवाच्या यशस्वितेसाठी गायत्री जाधव, अजय यंगल, श्रीशैल माने, देवराज पांढरे, रिया चव्हाण, वीर चव्हाण, पौर्णिमा शिवपुंजे आणि जोथम कराळ यांनी परिश्रम घेतले.
