सोलापूर : प्रियकरावर दाखल असलेल्या गुन्ह्यात कोर्टाने जामीन देण्यास नकार दिल्याने त्याला वाचवण्यासाठी प्रेयसीने चक्क आपल्यावर चार जणांनी सामूहिक अत्याचार केल्याचा बनाव केला; पण पोलिसांनी तपास केल्यानंतर मात्र सारं खोटं असल्याचं स्पष्ट झालं. पोलिसांनी खोटी तक्रार देण्यासाठी आलेली प्रेयसी व तिचा प्रियकर समीर चांदसाब शेख (वय २८, रा. कुमठा) यांच्यावरच उलट गुन्हा दाखल दाखल केला, अशी माहिती पोलिस आयुक्त एम. राज कुमार यांनी पत्रकार परिषदेत दिली.
याप्रकरणी दोन्ही आरोपींना रविवारी कोर्टासमोर हजर करण्यात आले. प्रेयसी मुलीचे पदव्यूत्तर पदवीपर्यंत शिक्षण झाले आहे. ती ब्युटीपार्लर चालविते. तिचे आणि आरोपी समीर यांचे २०२२ पासून एकमेकांवर प्रेम आहे. समीर याच्यावर एका मुलीला आत्महत्येस प्रवृत्त केल्याप्रकरणी डिसेंबर २०२३ रोजी गुन्हा दाखल होऊन अटक झाली. या प्रकरणी त्याला हायकोर्टाने जामीन दिले होते. अपिलात १७ मार्च २०२६ रोजी सुप्रीम कोर्टाने त्यांचा जामीन नामंजूर केले होते. यामुळे समीर पुन्हा जेलमध्ये जाणार होता. यासाठी आरोपी मुलगी आणि समीर यांनी संगनमत करून हा बनाव केला. समीरवर दाखल असलेल्या गुन्ह्यातील साक्षीदारांवर प्रतिमाने अत्याचाराचा आरोप केल्याचे तपासात उघडकीस आले. हा गुन्हा दाखल करून त्यांच्याशी डील करून समीरला सोडवण्याचा त्यांचा प्लॅन होता, असा अंदाज पोलिसांकडून वर्तवण्यात आला. या पत्रकार परिषदेवेळी पोलिस उपायुक्त विजय कबाडे, सहायक पोलिस आयुक्त दिलीप पवार, विजापूर नाका पोलिस ठाण्याचे वरिष्ठ पोलिस निरीक्षक दादा गायकवाड, दुपोनि सुशांत वराळे, गुन्हे प्रकटीकरण पथकाचे शीतलकुमार गायकवाड, सपोनि सविता मोरे पाटील उपस्थित होते.
ही कामगिरी वरिष्ठांच्या मार्गदर्शनाखाली सविता क्षीरसागर, अप्पा पवार, अजय परदेशी, गणेश शिर्के, सचिन हार, फुटाणे, जाधव, सद्दाम आबादीराजे, अमृत सुरवसे, कोर्सेगाव, समाधान मारकड, राहुल विटकर, स्वप्निल जाधव, संतोष माने आदींनी केली.
