सोलापूर : जिल्ह्यातील स्थानिक स्वराज्य संस्थांच्या निवडणुकांत भाजपला घवघवीत यश मिळवून दिल्यानंतर पालकमंत्री जयकुमार गोरे जयकुमार गोरे यांच्या अजेंड्यावर आता विकासाचा मुद्दा आला आहे. सोलापूर व सातारा जिल्ह्यांतील निवडणुकांची जबाबदारी यशस्वीपणे पूर्ण केल्यानंतर उद्या (सोमवार, ता. ६) त्यांनी संपूर्ण दिवस बैठकींसाठी राखून ठेवला आहे. भाजप स्थापना दिनानिमित्त सोलापूर शहरातील मुख्य कार्यक्रमालाही ते उपस्थित राहणार आहेत.
सोमवारी सकाळी ८.१५ वाजता ते भाजपच्या मध्यवर्ती कार्यालयात येणार असून स्थापना दिनानिमित्त ध्वजारोहण कार्यक्रमास उपस्थित राहणार आहेत. त्यानंतर नियोजन भवनात सकाळी ११.३० वाजता अरण (ता. माढा) येथील श्री संत सावता महाराज स्मारकाची आढावा बैठक होणार आहे. दुपारी १२ वाजता मंगळवेढ्यातील जगतज्योती महात्मा बसवेश्वर स्मारकाची आढावा बैठक घेण्यात येणार आहे.दुपारी १ वाजता जयकुमार गोरे जिल्हा परिषदेच्या पदाधिकाऱ्यांसोबत नियोजन भवनात विविध विषयांवर चर्चा होणार आहे. त्यानंतर दुपारी १.३० वाजता महापालिका पदाधिकाऱ्यांसोबतही तेथेच चर्चा केली जाणार आहे. दुपारी २ वाजता जिल्हाधिकारी एस. कार्तिकेयन, महापालिका आयुक्त डॉ. सचिन ओम्बासे, पोलिस आयुक्त एम. राजकुमार, पोलिस अधीक्षक अतुल कुलकर्णी, जिल्हा परिषदेचे मुख्य कार्यकारी अधिकारी कुलदिप जंगम यांच्यासोबत जिल्ह्यातील विविध विषयांवर चर्चा होणार आहे. दुपारी ३ ते ४ हा वेळ त्यांनी शासकीय विश्रामगृहात राखीव ठेवला आहे. दुपारी ४.३० वाजता महापालिकेच्या सेवा सुविधा केंद्र इमारतीच्या भूमिपूजन समारंभास कोटणीस कॉम्प्लेक्स येथे ते उपस्थित राहणार आहेत
