सोलापूर : मंद्रूप पोलीस ठाण्यात दाखल असलेल्या जबरी चोरी आणि मारहाण प्रकरणातील अटकेत असलेल्या दोन आरोपींना प्रथमवर्ग न्यायदंडाधिकारी श्री. शिलवंत यांनी अटी व शर्तींसह जामीन मंजूर केला आहे.
या प्रकरणात फिर्यादीच्या तक्रारीनुसार, काही व्यक्तींनी त्यांचे वाहन अडवून त्यांना गंभीर मारहाण केली आणि त्यांच्याकडील मोठी रोख रक्कम जबरदस्तीने हिसकावून नेल्याचा आरोप करण्यात आला होता. या तक्रारीवरून मंद्रूप पोलीस ठाण्यात भारतीय न्याय संहिता (बीएनएस) २०२३ मधील कलम ३०९(६) व ३(५) अंतर्गत गुन्हा क्रमांक १४२/२०२६ दाखल करण्यात आला. तपासादरम्यान पोलिसांनी आनंद भरत गावडे (वय २९, रा. भीमनगर, भंडारकवठे, सोलापूर) आणि आशिष मलसिद्ध कांबळे (वय २५, रा. उल्हासनगर, ठाणे) या दोघांना अटक करून न्यायालयात हजर केले होते.
जामीन अर्जावरील सुनावणीदरम्यान बचाव पक्षाने आरोपींविरुद्ध ठोस आणि थेट पुरावा उपलब्ध नसल्याचा मुद्दा न्यायालयासमोर मांडला. तसेच तपासासाठी पुढील पोलीस कोठडीची आवश्यकता नसून आरोपी तपासात सहकार्य करण्यास तयार असल्याचे सांगण्यात आले. आरोपी कायमस्वरूपी पत्त्यावर वास्तव्यास असल्याने ते फरार होण्याची किंवा पुराव्यांमध्ये हस्तक्षेप करण्याची शक्यता नसल्याचाही युक्तिवाद करण्यात आला. दोन्ही बाजूंचा युक्तिवाद ऐकल्यानंतर न्यायालयाने आरोपींना आवश्यक अटी व शर्तींसह जामीन मंजूर केला.
या प्रकरणात आरोपींच्या वतीने ॲड. कदीर औटी, ॲड. वैभव बोंगे, ॲड. ओंकार फडतरे, ॲड. अजय वाघमारे, ॲड. शिवरत्न वाघ, ॲड. मोहीम पठाण, ॲड. मनिष बाबरे, ॲड. रोहित थोरात, ॲड. संकेत पवार आणि ॲड. त्वरिता वाघ यांनी बाजू मांडली.
