सोलापूर : मुख्यमंत्री देवेंद्र फडणवीस यांच्या ५६ व्या वाढदिवसानिमित्त भारतीय जनता पक्षाच्या सोलापूर शहर मध्य विधानसभा मतदारसंघाच्या वतीने आमदार देवेंद्र कोठे यांच्या नेतृत्वाखाली शहरातील तीन ठिकाणी भव्य रक्तदान शिबिराचे आयोजन करण्यात आले. समाजोपयोगी या उपक्रमाला नागरिकांचा उत्स्फूर्त प्रतिसाद लाभला असून २ हजारांहून अधिक रक्तदात्यांनी रक्तदान करून सामाजिक बांधिलकी जपली.
अशोक चौक येथील बोल्ली मंगल कार्यालय, दाजी पेठ येथील राम मंदिर परिसर आणि एम्प्लॉयमेंट चौक येथील इंद्रप्रस्थ मंगल कार्यालय येथे सकाळपासून रक्तदान शिबिर सुरू झाले. दुपारी अडीचपर्यंत मध्य पूर्व मंडळातून ५२०, मध्य मंडळातून २६९ आणि मध्य पश्चिम मंडळातून १३२, अशा एकूण ९२१ रक्तदात्यांनी रक्तदान केले. सायंकाळपर्यंत रक्तदात्यांची संख्या वाढून २ हजारांहून अधिक झाल्याची माहिती आयोजकांनी दिली. यावेळी आमदार देवेंद्र कोठे आणि त्यांच्या पत्नी मोनिका कोठे यांनीही स्वतः रक्तदान करून उपक्रमात सहभाग नोंदवला. मुख्यमंत्री देवेंद्र फडणवीस यांना वाढदिवसाच्या शुभेच्छा अर्पण करताना रक्तदान हा समाजाप्रती असलेला छोटासा पण अमूल्य वाटा असल्याची भावना त्यांनी व्यक्त केली.
अपघात, शस्त्रक्रिया, विविध आजार तसेच आपत्कालीन परिस्थितीत रुग्णांना वेळेवर रक्त उपलब्ध व्हावे, रक्तपेढ्यांमध्ये मुबलक रक्तसाठा निर्माण व्हावा आणि रक्ताअभावी कोणाचाही जीव धोक्यात येऊ नये, या उद्देशाने या शिबिराचे आयोजन करण्यात आल्याचे आयोजकांनी सांगितले. या रक्तदान शिबिराच्या यशस्वी आयोजनासाठी सर्व नगरसेवक, मंडल अध्यक्ष, पदाधिकारी, कार्यकर्ते आणि स्वयंसेवक यांनी परिश्रम घेतले. नागरिकांच्या उत्स्फूर्त प्रतिसादामुळे हा उपक्रम मध्य विधानसभा मतदारसंघातील विक्रमी समाजोपयोगी उपक्रम ठरल्याची भावना आयोजकांनी व्यक्त केली.
