सोलापूर : ग्रामीणच्या सायबर पोलिसांनी सीईआयआर पोर्टलच्या माध्यमातून तांत्रिक विश्लेषण करुन गहाळ झालेल्या एकूण ५३ मोबाइलचा शोध घेतला आहे.सोलापूर ग्रामीण पोलीस दलाचे अधिपत्याखालील पोलीस ठाण्याच्या हददीमध्ये राहण्यास असलेल्या नागरिकांचे गहाळ, चोरीस गेलेल्या विविध कंपनीच्या ५३ अॅन्ड्रॉईड मोबाइलचा शोध लावण्यात सोलापूर ग्रामीण सायबर पोलिसांना यश आले आहे.
पोलीस अधीक्षक अतुल कुलकर्णी यांच्या मार्गदर्शनाखाली सोलापूर ग्रामीण जिल्हयामधील नागरिकांचे गहाळ मोबाइलचा शोध घेण्याबाबत विशेष मोहीम राबविण्याचे निर्देश सायबर पोलीस ठाण्याचे फौजदार अमितकुमार करपे यांना दिले होते. त्यांनी सायबर पोलीस ठाण्याच्या टीमने विशेष मोहीम राबवून जिल्हयातील सर्व पोलीस ठाणे हद्दीत गहाळ झालेल्या मोबाइलबाबत सी.ई. आय. आर. पोर्टलद्वारे तांत्रिक विश्लेषण केले व सदर हरविलेल्या मोबाइलचा शोध घेऊन सुमारे आठ लाखांचे विविध कंपनीचे ५३ मोबाइल हॅन्डसेट हस्तगत केले.
सदरचे मोबाइल संबंधित मुळ खरेदीदार यांच्या ताब्यात पोलीस अधीक्षक कुलकर्णी यांच्या हस्ते सुपुर्द करण्यात आले असून हरवलेले मोबाइल पुन्हाः मिळाल्याने मोबाइलधारकांतून समाधान व्यक्त करण्यात आले आहे. ही कामगिरी पोलीस अधीक्षक अतुल कुलकर्णी, अपर पोलीस अधीक्षक प्रितम यावलकर यांच्या मार्गदर्शनाखाली पोलीस उपनिरीक्षक अमितकुमार करपे, पोलीस अंमलदार जाधव यांनी केली.
