स्विफ्ट कारसह सोन्या-चांदीचे दागिने जप्त; आंतरराज्यीय चोरटा पकडला
सोलापूर : शहर गुन्हे शाखेने अवघ्या ४८ तासांच्या आत एका आंतरराज्यीय कुख्यात घरफोडी करणाऱ्या आरोपीला बेड्या ठोकल्या. पोलिसांनी त्याच्याकडून ८.२ तोळे सोन्याचे दागिने, ३० तोळे चांदीचे दागिने, रोख रक्कम आणि गुन्ह्यात वापरलेली स्विफ्ट कार असा एकूण ८ लाख ७२ हजारांचा मुद्देमाल हस्तगत केला आहे. याप्रकरणी पोलिसांनी आरोपी शिवप्रसाद आदिनारायण मंत्री उर्फ मंत्रीशंकर (वय ४८, रा. सत्यनारायण कॉलनी, जि. मळकाजगिरी, राज्य तेलंगणा) याला अटक केली आहे. त्याच्यावर विविध राज्यांत ३५ हून अधिक घरफोडीचे गुन्हे दाखल आहेत.
जुळे सोलापूर भागातील गीतानगर येथील रहिवासी रेवती तमशेट्टी या घराला कुलूप लावून कुटुंबासह परगावी गेल्या होत्या. तेव्हा त्यांच्या घरी चोरी झाली होती. याप्रकरणी १४ मे रोजी विजापूर नाका पोलिस ठाण्यात गुन्हा दाखल करण्यात आला होता. गुन्हे शाखेचे वरिष्ठ पोलिस निरीक्षक अरविंद माने यांच्या मार्गदर्शनाखाली पोलिस उपनिरीक्षक मुकेश गायकवाड व त्यांच्या पथकाला तांत्रिक तपास आणि सीसीटीव्ही फुटेजच्या आधारे संशयित आरोपीची माहिती मिळाली. १५ मे रोजी मध्यरात्री १२ वाजेच्या सुमारास मार्केट पोलिस चौकीसमोरील सार्वजनिक रस्त्यावर एक संशयास्पद कार थांबलेली आढळली. पोलिसांनी ड्रायव्हिंग सीटवर असलेल्या संशयिताला ताब्यात घेत चौकशी केल्यानंतर तो आरोपी मंत्री शंकर असल्याचे समजले. त्याने दोन दिवसांपूर्वी जुळे सोलापूर भागात घरफोडी केल्याची कबुली दिली. ही कामगिरी पोलिस उपायुक्त डॉ. अश्विनी पाटील आणि सहायक पोलिस आयुक्त राजन माने यांच्या मार्गदर्शनाखाली गुन्हे शाखेचे पोलिस उपनिरीक्षक मुकेश गायकवाड, अंमलदार नंदराम गायकवाड, वाजिद पटेल, योगेश बर्डे, संजय साळुंखे, सतीश काटे यांनी केली.
