सोलापूरच्या विकासासाठी केंद्राकडून निधी आणणार; खासदार प्रा. डॉ. ज्योती वाघमारे

सोलापूर : सोलापूर शहराचा सर्वांगीण विकास हेच आपले सर्वोच्च प्राधान्य असून, शहरासाठी केंद्र शासनाकडून आवश्यक निधी उपलब्ध करून देण्यासाठी सातत्याने पाठपुरावा केला जाईल, अशी ग्वाही राज्यसभा खासदार प्रा. डॉ. ज्योती वाघमारे यांनी दिली. प्रशासनाने गतिमान, पारदर्शक आणि लोकाभिमुख पद्धतीने काम करत केंद्र शासनाच्या विविध योजनांचा लाभ प्रत्येक नागरिकापर्यंत पोहोचवावा, असे निर्देशही त्यांनी दिले.

शहराच्या विकासकामांना गती देण्यासाठी आणि नागरिकांच्या मूलभूत समस्यांचे प्रभावी निराकरण करण्याच्या उद्देशाने खासदार डॉ. वाघमारे यांनी गुरुवारी सोलापूर महानगरपालिकेत विविध विभागांची विशेष आढावा बैठक घेतली. बैठकीत पाणीपुरवठा, रस्ते, स्वच्छता, सांडपाणी व्यवस्थापन, सार्वजनिक सुविधा, पायाभूत विकास तसेच केंद्र शासनाच्या विविध लोककल्याणकारी योजनांच्या अंमलबजावणीचा सविस्तर आढावा घेण्यात आला. यावेळी महापालिका आयुक्त डॉ. सचिन ओम्बासे, अतिरिक्त आयुक्त वीणा पवार, शिवसेनेचे गटनेते अमोल शिंदे, नगरसेवक प्रियदर्शन साठे, नगर अभियंता अकुलवार तसेच विविध विभागांचे वरिष्ठ अधिकारी उपस्थित होते.बैठकीदरम्यान प्रशासन आणि लोकप्रतिनिधींमध्ये प्रभावी समन्वय राखून विकासकामे निश्चित वेळेत पूर्ण करण्यावर भर देण्यात आला.

नागरिकांच्या दैनंदिन समस्या तातडीने सोडविण्यासाठी प्रत्येक विभागाने नियोजनबद्ध, जबाबदारीने आणि परिणामकारक पद्धतीने काम करावे, असे निर्देश खासदार डॉ. वाघमारे यांनी अधिकाऱ्यांना दिले. तसेच केंद्र शासनाच्या विविध योजनांची प्रभावी अंमलबजावणी करून त्यांचा लाभ जास्तीत जास्त नागरिकांपर्यंत पोहोचावा, यासाठी व्यापक जनजागृती करण्याच्या सूचनाही त्यांनी प्रशासनाला दिल्या. सोलापूरच्या सर्वांगीण विकासासाठी केंद्र आणि स्थानिक प्रशासन यांच्यातील समन्वय अधिक मजबूत करण्याची आवश्यकता असल्याचेही त्यांनी यावेळी नमूद केले.