शिक्षणाधिकारी सचिन जगताप यांनी दिली माहिती..
सोलापूर : महाराष्ट्र राज्य माध्यमिक व उच्च माध्यमिक शिक्षण मंडळ, पुणे यांच्या वतीने घेण्यात येणाऱ्या इयत्ता दहावीच्या फेब्रुवारी/मार्च २०२६ परीक्षेला गुरुवारी सुरुवात झाली. परीक्षेच्या पहिल्याच दिवशी प्रथम भाषा मराठीचा पेपर पार पडला. सोलापूर जिल्ह्यातील विविध परीक्षा केंद्रांवर परीक्षा शांततेत व नियोजनबद्ध पद्धतीने पार पडल्याचे चित्र दिसून आले.
जिल्ह्यातील एकूण १५ परीक्षा केंद्रांवर ६१ हजार ९६५ विद्यार्थ्यांची नोंदणी होती. यापैकी ६० हजार ७१६ विद्यार्थी परीक्षेला उपस्थित राहिले, तर १ हजार २४९ विद्यार्थी गैरहजर राहिल्याची माहिती शिक्षण मंडळाच्या उपस्थिती तक्त्यातून समोर आली आहे.सर्वाधिक उपस्थिती अक्कलकोट तालुक्यातील सिद्धेश्वर माने विद्यालय केंद्रावर नोंदविण्यात आली असून येथे ५ हजार ९१६ विद्यार्थी उपस्थित होते.
त्याठिकाणी १२३ विद्यार्थी गैरहजर राहिले. तसेच बार्शी, माढा, पंढरपूर, माळशिरस, मोहोळ आदी तालुक्यांतील केंद्रांवरही मोठ्या संख्येने विद्यार्थ्यांनी परीक्षा दिली.सोलापूर शहरातील गणपती घाट, विजापूर रोड, हायस्कूल परिसर, न्यू इंग्लिश स्कूल, छत्रपती शिवाजी हायस्कूल, भारती विद्यापीठ आदी केंद्रांवर परीक्षेची सुरळीत अंमलबजावणी करण्यात आली. बहुतांश केंद्रांवर गैरहजेरीचे प्रमाण अल्प असल्याचे दिसून आले.परीक्षेच्या पार्श्वभूमीवर केंद्रांवर पोलीस बंदोबस्त, भरारी पथके, तसेच कॉपीमुक्त अभियान राबविण्यात आले. कुठेही अनुचित प्रकार घडल्याची नोंद नाही. मराठी विषयाचा प्रश्नपत्रिका स्तर विद्यार्थ्यांना अभ्यासक्रमानुसार व अपेक्षित स्वरूपाची असल्याची प्रतिक्रिया अनेक विद्यार्थ्यांनी दिली.
दरम्यान, पुढील विषयांच्या परीक्षा ठरलेल्या वेळापत्रकानुसार पार पडणार असून शिक्षण मंडळाकडून विद्यार्थ्यांना वेळेवर परीक्षा केंद्रावर उपस्थित राहण्याचे आवाहन करण्यात आले आहे.
