सोलापूर: जागतिक युद्धजन्य परिस्थितीमुळे इंधनाचा तुटवडा निर्माण होण्याची आणि दरवाढीची शक्यता लक्षात घेऊन, सोलापूर जिल्ह्यात घरगुती एलपीजी (LPG) गॅसचा काळाबाजार रोखण्यासाठी जिल्हा प्रशासनाने कंबर कसली आहे.
जिल्हा पुरवठा अधिकारी संतोष सरडे यांनी यासंदर्भात जिल्ह्यातील सर्व तहसीलदारांना कडक अंमलबजावणीचे आदेश दिले आहेत.प्रत्येक तालुक्यात घरगुती गॅसच्या वितरणावर लक्ष ठेवण्यासाठी विशेष ‘दक्षता पथक’ किंवा ‘फिरते पथक’ तैनात करण्यात आले आहे. गॅस एजन्सीकडून होणाऱ्या वितरणात पारदर्शकता राहावी यासाठी अचानक तपासणी (Surprise Inspection) करण्यात येणार आहे. घरगुती गॅसचा व्यावसायिक किंवा इतर अवैध कामांसाठी वापर करणाऱ्यांवर कठोर कायदेशीर कारवाई केली जाईल. नागरिकांना घरगुती गॅसचा पुरवठा सुरळीत आणि वेळेवर व्हावा, यासाठी सर्व आवश्यक उपाययोजना करण्याचे निर्देश प्रशासनाला देण्यात आले आहेत.
शासनाच्या प्राप्त पत्रानुसार, सध्याच्या जागतिक परिस्थितीचा फायदा घेऊन काही ठिकाणी इंधनाचा अवैध साठा किंवा ‘ब्लॅक मार्केटिंग’ (Black Marketing) होण्याची शक्यता नाकारता येत नाही. ही परिस्थिती हाताळण्यासाठी आणि सर्वसामान्यांचे हित जपण्यासाठी जिल्हाधिकारी कार्यालयाने हे पाऊल उचलले आहे.या मोहिमेचा अहवाल तातडीने सादर करण्याचे आदेशही संबंधित विभागांना देण्यात आले असून, यामध्ये कोणताही विलंब खपवून घेतला जाणार नाही, असे जिल्हा पुरवठा विभागाने स्पष्ट केले आहे.
