सोलापूर : सोलापूरच्या ऐतिहासिक टेरिटॉवेल आणि चादर उद्योगाला मोठा दिलासा मिळण्याची शक्यता निर्माण झाली आहे. भौगोलिक मानांकन (जीआय) प्राप्त सोलापूरच्या टॉवेल व चादरींना राज्य शासनाच्या विविध विभागांच्या खरेदीमध्ये प्राधान्य देण्याबाबत मुख्यमंत्री देवेंद्र फडणवीस आणि वस्त्रोद्योग मंत्री संजय सावकारे यांच्याकडे मागणी करण्यात आली आहे. या मागणीवर दोन्ही नेत्यांनी सकारात्मक भूमिका घेत लवकरच धोरणात्मक निर्णय घेण्याचे आश्वासन दिले.
सोलापूरच्या चादरी आणि टेरिटॉवेलला २००५ मध्ये जीआय मानांकन मिळाले असून देशासह परदेशातही या उत्पादनांची स्वतंत्र ओळख निर्माण झाली आहे. मात्र, कच्च्या मालाच्या वाढत्या किंमती, जागतिक बाजारातील स्पर्धा आणि घटती मागणी यामुळे सोलापूरचा वस्त्रोद्योग सध्या आर्थिक संकटाचा सामना करत आहे. जिल्ह्यातील ९५ टक्क्यांहून अधिक वस्त्रोद्योग युनिट्स सूक्ष्म व लघुउद्योगांच्या श्रेणीत येतात. या उद्योगावर हजारो कामगार आणि त्यांच्या कुटुंबांचा उदरनिर्वाह अवलंबून आहे. त्यामुळे शासकीय खरेदीत स्थानिक जीआय उत्पादनांना प्राधान्य मिळाल्यास उद्योगाला मोठी चालना मिळणार आहे.
केंद्र शासनाने ‘जेम’ (GeM) पोर्टलवर जीआय मानांकित आणि स्थानिक उत्पादनांच्या खरेदीसाठी विशेष तरतूद केली आहे. त्याच धर्तीवर महाराष्ट्र शासनानेही शासकीय विभाग तसेच शासनाच्या कंत्राटदारांकडून सोलापूरच्या जीआय मानांकित टॉवेल व चादरींची खरेदी बंधनकारक करावी, अशी मागणी शिष्टमंडळाने केली. आमदार देवेंद्र कोठे यांच्या पुढाकारातून ही मागणी शासनापर्यंत पोहोचविण्यात आली. यावेळी महापौर विनायक कोंड्याल यांच्यासह वस्त्रोद्योग क्षेत्रातील उद्योजक, व्यापारी आणि संबंधित प्रतिनिधी उपस्थित होते.
