पत्रकार आणि जनसेवक अशा दुहेरी भूमिकेतून शहराच्या विकासासाठी योगदान: मनीष केत.
सोलापूर: सोलापूर महानगरपालिकेच्या स्वीकृत नगरसेवकपदी निवड झाल्याबद्दल भाजपचे नेते आणि ज्येष्ठ पत्रकार मनीष केत यांचा सोलापूर क्राइम रिपोर्टर्स असोसिएशनच्या वतीने सत्कार करण्यात आला. पत्रकारितेच्या क्षेत्रातील योगदानासोबतच आता जनसेवेची नवी जबाबदारी मिळाल्याबद्दल त्यांचे कौतुक करण्यात आले. असोसिएशनच्या कार्यालयात झालेल्या या सत्कार समारंभास असोसिएशनचे अध्यक्ष अरुण रोटे उपस्थित होते. त्यांच्या हस्ते मनीष केत यांचा शाल व पुष्पगुच्छ देऊन सन्मान करण्यात आला.
याप्रसंगी बोलताना उपस्थितांनी सांगितले की, मनीष केत यांनी पत्रकारितेच्या माध्यमातून समाजाचे प्रश्न सातत्याने मांडले आहेत. आता स्वीकृत नगरसेवक म्हणून त्यांना शहराच्या विकासासाठी अधिक ठोस काम करण्याची संधी मिळाली आहे. पत्रकार आणि जनसेवक अशा दोन्ही भूमिकांतून ते शहराच्या सर्वांगीण विकासासाठी मोलाचे योगदान देतील, असा विश्वास यावेळी व्यक्त करण्यात आला.
या सत्कार सोहळ्याला अनिल कदम, विनायक होटकर, अमोल व्यवहारे, परशुराम कोकणे, रुपेश हेवळे, रजनीकांत उपलंची, अभिषेक अदप्पा यांच्यासह क्राइम रिपोर्टर्स असोसिएशनचे पदाधिकारी आणि सदस्य मोठ्या संख्येने उपस्थित होते. सर्व उपस्थित पत्रकारांनी मनीष केत यांना त्यांच्या पुढील सामाजिक आणि सार्वजनिक कार्यास शुभेच्छा दिल्या.
