सोलापूर : महानगरपालिकेच्या रुग्णवाहिका सेवेमध्ये मोठ्या प्रमाणात गडबड झाली आहे. पंधरापैकी आठ रुग्णवाहिका बंद अवस्थेत आहेत. याकडे प्रशासनाचे दुर्लक्ष होत आहे. महापालिकेकडे असलेल्या रुग्णवाहिकांपैकी अनेक गाड्या बंद अवस्थेत असल्याने नागरिकांना वेळेवर आरोग्य सेवा मिळण्यात अडचणी निर्माण होत असल्याचा आरोप शिवसेना शिंदे गटाचे गटनेते अमोल शिंदे यांनी केला आहे.
शिवसेना शिंदे गटाचे महापालिकेचे गटनेते अमोल शिंदे यांनी बुधवारी सोलापूर शासकीय रुग्णालयासमोर असलेल्या रुग्णवाहिका स्थळाला भेट दिली असता धक्कादायक स्थिती समोर आली. महापालिकेकडे एकूण सुमारे १७ रुग्णवाहिका असताना त्यापैकी ८ रुग्णवाहिका पूर्णपणे बंद असल्याचे आढळून आले. त्यामुळे आपत्कालीन परिस्थितीत नागरिकांना मोठा त्रास सहन करावा लागत असल्याचे त्यांनी सांगितले. यावेळी सोलापूर महानगरपालिकेच्या आरोग्य अधिकारी डॉ. राखी माने यांच्याकडूनही माहिती घेतली. त्यांनी या सेवेत येणाऱ्या अडचणी सांगितल्या.
२०२२ ते २०२४ या कालावधीत रुग्णवाहिका खरेदी प्रक्रियेदरम्यान तब्बल २३ फेरफार झाल्याचा आरोपही त्यांनी केला. एवढ्या फेरफारानंतरही आज अनेक रुग्णवाहिका बंद पडलेल्या असणे ही गंभीर बाब असल्याचे त्यांनी नमूद केले. “रुग्णांना वेळेवर सेवा मिळत नसेल तर आम्हाला आंदोलन केल्याशिवाय पर्याय राहणार नाही. नागरिकांच्या आरोग्याशी खेळ होऊ देणार नाही,” असा इशारा शिंदे यांनी दिला.
