सोलापूर : जलसंपदा विभागाची दंडाची रक्कम थकल्यामुळे हिप्परगा येथील पंपगृह सील करण्याची कारवाई सुरू करण्यात आली होती. यामुळे शहराच्या पाणीपुरवठ्यावर परिणाम होण्याची शक्यता निर्माण झाली होती. मात्र, परिस्थितीचे गांभीर्य ओळखून सोलापूर महानगरपालिकेने तातडीने 28 लाख रुपये भरले. त्यामुळे पंपगृह सील करण्याची कारवाई तात्पुरती थांबली आहे.
उजनी हिप्परगा, टाकळी या तीन सोर्समधून सोलापूर शहराला पाणीपुरवठा होतो. त्यापोटी महापालिका जलसंपदा विभागाला दरवर्षी 18 कोटी रूपये भरते. याव्यतीरिक्त महापालिकेने जो पाणी उपसा केला होता, त्यापोटी पालिकेला 1 कोटी 20 लाखांचा दंड जलसंपदा विभागने केला होता. ती रक्कम महापालिकेने भरली नव्हती. त्यामुळे जलसंपदा विभागाचे अधिकारी हिप्परगा येथील पंपगृह सील करण्यासाठी आले होते. मात्र महापालिकेने गांभिर्य ओळखून 28 लाख रूपये तत्काळ भरले. याशिवाय उर्वरित 92 लाख बुधवारी भरणार असल्याचे कळवले. त्यामुळे त्यामुळे पंपगृह सील करण्याची कारवाई तात्पुरती थांबली आहे.
याशिवाय तीन सोर्समधून महापालिका जी पाणी घेते त्यातील 18 पैकी 10 कोटी रूपयेही महापालिका बुधवारी भरणार आहे. पाणीपुरवठा सुरळीत ठेवण्यासाठी प्रशासनाने घेतलेल्या या तातडीच्या निर्णयामुळे नागरिकांना संभाव्य पाणीटंचाईपासून मोठा दिलासा मिळाला आहे.
