सोलापूर पुणे: राज्यातील शिक्षकांची थकीत बिले आणि प्रलंबित प्रशासकीय कामांबाबत शिक्षक आमदार जयंत आसगावकर यांनी सोमवारी आक्रमक पवित्रा घेतला. पुणे येथील शिक्षण संचालक कार्यालयात दिवसभर थांबून त्यांनी थकीत बिलांचा सविस्तर आढावा घेतला. “संचालक स्तरावरील सर्व बिले आजच्या आज मार्गी लावा,” असे स्पष्ट आदेश त्यांनी शिक्षण संचालक महेश पालकर यांना दिले. या धडक कारवाईमुळे शिक्षण विभागात मोठी खळबळ उडाली आहे.
यावेळी बोलताना आमदार आसगावकर म्हणाले की, “अर्थसंकल्पीय अधिवेशनात शिक्षण मंत्र्यांनी ३१ मार्चपूर्वी सर्व थकीत बिले दिली जातील, असे आश्वासन दिले होते. मात्र, प्रशासकीय स्तरावर त्याची प्रभावी अंमलबजावणी होताना दिसत नाही. अनेक अधिकारी ऐनवेळी बिलांमध्ये किरकोळ त्रुटी काढून ती प्रलंबित ठेवतात, ही बाब अत्यंत गंभीर आहे.” जे अधिकारी हेतुपुरस्सर बिले काढण्यास विलंब लावतात, त्यांच्यावर तात्काळ कठोर कारवाई करावी, अशी मागणीही त्यांनी यावेळी लावून धरली.
केवळ बिलांचाच नव्हे, तर शिक्षकांच्या इतर जिव्हाळ्याच्या प्रश्नांवरही त्यांनी चर्चा केली. शिक्षण उपसंचालक गणपतराव मोरे यांना प्रलंबित असलेले ‘शालार्थ आयडी’ त्वरित देण्याच्या सूचना केल्या. तसेच, कोल्हापूर जिल्ह्यातील शिक्षकांना भेडसावणाऱ्या पीएफ (भविष्य निर्वाह निधी) बिलांच्या समस्येवर त्यांनी थेट जागेवरूनच तोडगा काढला. आमदार आसगावकरांच्या सूचनेनंतर, संचालक पालकर यांनी कोल्हापूर वेतन पथक अधीक्षकांशी भ्रमणध्वनीवरून संपर्क साधून तातडीने पीएफ बिले देण्याचे निर्देश दिले.
- शिक्षकांचे प्रश्न ‘ऑन द स्पॉट’ निकाली या बैठकीवेळी पुणे आणि कोल्हापूर विभागातून मोठ्या संख्येने शिक्षक बांधव उपस्थित होते. शिक्षकांनी आपले वैयक्तिक आणि सामूहिक प्रश्न आमदार जयंत आसगावकर यांच्यासमोर मांडले. यावेळी त्यांनी संचालक, उपसंचालक आणि शिक्षणाधिकारी यांच्याशी थेट संवाद साधून अनेक तांत्रिक प्रश्न जागेवरच निकाली लावले.
- आमदार जयंत आसगावकर यांच्या या ‘ॲक्शन मोड’मुळे अनेक महिन्यांपासून रखडलेल्या फायलींना गती मिळाली असून, ३१ मार्चच्या अखेरीस शिक्षकांना मोठा दिलासा मिळाला आहे. या बैठकीत झालेल्या सकारात्मक चर्चेमुळे शिक्षक संघटनांनी समाधान व्यक्त केले आहे.
