सोलापूर: उत्तर सोलापूर तालुक्यातील मौजे कोंडी आणि बीबी दारफळ परिसरात सुरू असलेल्या अवैध गौण खनिज उत्खननावर महसूल विभागाने मोठी कारवाई केली आहे. जिल्हाधिकारी कार्तिकेय एस. यांच्या मार्गदर्शनाखाली तहसीलदार निलेश पाटील यांच्या पथकाने ही धाड टाकली असून, या कारवाईत एकूण ६ हायवा आणि १ पोकलँड मशीन जप्त करण्यात आली आहे.
गेल्या काही दिवसांपासून कोंडी आणि बीबी दारफळ परिसरात बेकायदेशीरपणे गौण खनिजाचे उत्खनन होत असल्याची माहिती महसूल प्रशासनाला मिळाली होती. या माहितीच्या आधारे उत्तर सोलापूर तहसील कार्यालयाने सापळा रचून ही कारवाई केली. जप्त केलेली सर्व वाहने आणि मशिनरी ताब्यात घेऊन संबंधित मालक आणि चालकांविरुद्ध सोलापूर तालुका पोलीस स्टेशन येथे गुन्हा दाखल करण्यात आला आहे.
नूतन जिल्हाधिकारी कार्तिकेय एस. यांनी पदभार स्वीकारल्यानंतर अवैध धंद्यांविरोधात कडक पावले उचलण्याचे संकेत दिले होते. त्याच धर्तीवर ही मोठी कारवाई करण्यात आली आहे. “जिल्हाधिकाऱ्यांच्या सूचनेनुसार तालुक्यात कुठेही अवैध खनिज उत्खनन खपवून घेतले जाणार नाही. अशा बेकायदेशीर उपक्रमांना आळा घालण्यासाठी आमचे प्रशासन पूर्णपणे सज्ज असून यापुढेही कारवाईचे सत्र सुरूच राहील,” असा इशारा तहसीलदार निलेश पाटील यांनी दिला आहे.
