सोलापूर – मध्य रेल्वेचे महाव्यवस्थापक राजीव श्रीवास्तव यांनी, दि. १५.०४.२०२६ रोजी मुंबई येथील छत्रपती शिवाजी महाराज टर्मिनस येथे आयोजित समारंभात, सोलापूर विभागातील मध्य रेल्वेच्या २ कर्मचाऱ्यांना ‘संरक्षा पुरस्कारा’ने सन्मानित केले.
कर्तव्यावर असताना कर्मचाऱ्यांनी दर्शविलेली सतर्कता, प्रसंगावधान आणि कर्तव्यनिष्ठा यांचा गौरव करण्यासाठी हे सुरक्षा पुरस्कार प्रदान करण्यात आले. या गुणधर्मांमुळेच गेल्या काही महिन्यांत संभाव्य अनुचित घटना टळल्या आणि रेल्वेचे सुरक्षित परिचालन सुनिश्चित झाले. प्रत्येक पुरस्कारामध्ये एक पदक, प्रशस्तिपत्र, उत्कृष्ट सुरक्षा कार्याचा गौरव करणारा विशेष उल्लेख आणि ३५००/- रुपयांचे रोख बक्षीस यांचा समावेश आहे.
पुरस्कार विजेते रमेश तनमोर, तंत्रज्ञ (TRD), धाराशिव, सोलापूर विभाग यांनी दि. १७.०२.२०२६ रोजी येडशी-ढोकी विभागात पायी गस्त घालत असताना, त्यांना स्थान क्रमांक ४६४/०९ येथे एका OHE खांबाचा (Mast) ‘RRA क्लॅम्प’ वाकलेल्या आणि पिळवटलेल्या अवस्थेत दिसून आला. यामुळे OHE फिटिंगचा समतोल बिघडून OHE तार तुटण्याची आणि परिणामी एखादी अनुचित घटना घडण्याची शक्यता होती. त्यांची सतर्कता आणि वेळीच केलेल्या कृतीमुळे एक संभाव्य गंभीर दुर्घटना टळली. तर योगेंद्र कुमार, तंत्रज्ञ (TRD), दुधनी, सोलापूर विभाग: दि. २८.०१.२०२६ रोजी दुधनी-वाडी विभागात तपासणीचे कर्तव्य बजावत असताना, त्यांना किमी ५२३/२४ येथे एक ‘IR वायर ड्रॉपर’ तुटलेल्या आणि लटकलेल्या अवस्थेत दिसून आला. यामुळे रेल्वेच्या सुरक्षित संचालनावर गंभीर परिणाम होत होता. त्यांनी तात्काळ संबंधित सर्व अधिकाऱ्यांना याविषयी माहिती दिली आणि एक संभाव्य अपघात टाळला.
