सोलापूर: जिल्हा परिषद लिपिकांचे पदोन्नती टप्पे कमी करून त्यांना वर्ग-१ पर्यंतचे वेतन मिळवून देण्यासाठी राज्य संघटना आग्रही असून, शासन स्तरावर त्याचा सकारात्मक पाठपुरावा सुरू असल्याची माहिती राज्य कार्यकारिणीच्या संवाद बैठकीत देण्यात आली. सोलापूर येथे दि. १२ एप्रिल रोजी महाराष्ट्र राज्य जिल्हा परिषद लिपिक वर्गीय कर्मचारी संघटनेची ही महत्त्वपूर्ण बैठक पार पडली.
यावेळी संघटनेचे राज्याध्यक्ष सागर बाबर यांनी उपस्थितांना मार्गदर्शन केले. ते म्हणाले की, “लिपिकांच्या वेतन त्रुटीचा प्रश्न सोडवण्यासाठी आपण आपली तुलना तांत्रिक पदांऐवजी राज्य शासनाच्या लिपिकांशी करणे आवश्यक आहे. कनिष्ठ आणि सहाय्यक प्रशासन अधिकारी ही दोन पदे एकत्रित झाल्यास आश्वासित प्रगती योजनेचा थेट फायदा कनिष्ठ लिपिकांपर्यंत पोहोचेल.”
याप्रसंगी राज्य कोषाध्यक्ष उमाकांत सूर्यवंशी यांनी सांगितले की, ग्रामविकास मंत्री जयकुमार गोरे यांच्याकडे संघटनेचा पाठपुरावा सुरू असून, वरिष्ठ आणि कनिष्ठ सहाय्यक ही दोन पदे एकत्रित करण्याबाबतचा अहवाल लवकरच शासनाकडून मागवला जाईल. याच बैठकीत सोलापूर जिल्हा कार्यकारिणीची फेरनिवड करण्यात आली असून, अविनाश गोडसे यांची जिल्हाध्यक्षपदी बहुमताने निवड करण्यात आली. बैठकीच्या सुरुवातीला दिवंगत लिपिक नेत्यांना श्रद्धांजली वाहण्यात आली. यावेळी राज्यातील विविध जिल्ह्यांतील पदाधिकारी व सोलापूर जिल्ह्यातील लिपिक बांधव मोठ्या संख्येने उपस्थित होते. कार्यक्रमाचे सूत्रसंचालन जिल्हा कार्याध्यक्ष दिनेश काळे यांनी केले.
