सोलापूर : शहराच्या पाणीपुरवठ्यासाठी उपसा करण्यात येणाऱ्या दोन ठिकाणी वीजपुरवठा तब्बल ८ ते ९ तास खंडित राहिल्याने पाणी उपसा प्रक्रिया बंद होती परिणामी शहराचा पाणीपुरवठा पुन्हा एकदा एक रोटेशनसाठी एक दिवसाने पुढे जाणार आहे आणि यामुळेच संपूर्ण शहराचा पाणीपुरवठा पुढील आठवडाभरासाठी विस्कळीत होणार आहे.
शहरास पाणीपुरवठा करणाऱ्या सोरेगाव जलशुध्दीकरण केंद्रास महाराष्ट्र राज्य महावितरण मंडळाकडून होणारा विद्युत पुरवठा सोमवार, १३ ऑक्टोबर रोजी पहाटे ५.३० ते दुपारी १.१५ पर्यंत खंडित झाला होता तर पाकणी जलशुध्दीकरण केंद्रास होणारा विद्युत पुरवठा दुपारी १२.१० ते रात्री ९.३० वाजेपर्यंत खंडित झाला होता. यामुळे सोलापूर शहर पाणीपुरवठ्यासाठी टाकळी पंप हाऊसवरून सुमारे ८ तास व उजनी पंप हाऊसवरून सुमारे ९ तास पाण्याचा उपसा होऊ शकला नाही. या कारणामुळे सोमवारचा नियोजित पाणीपुरवठा होऊ शकलेला नाही. दोन्ही कारणामुळे संपूर्ण शहराचा मंगळवार, १४ ऑक्टोबरपासूनचा नियोजित पाणीपुरवठा एक रोटेशन एक दिवसाने पुढे जाणार आहे. शहरातील नागरिकांनी उपलब्ध पाण्याचा वापर काटकसरीने करून महापालिकेस सहकार्य करावे असे आवाहन प्रशासनाकडून करण्यात आले आहे.
सोलापूर ते उजनी दुहेरी जलवाहिनीचे काम पूर्ण होऊन शहराला आता अधिक पाणी मिळत असल्याने महापालिका प्रशासनाकडून शहरातील काही भागांमध्ये तीन दिवसांआड पाणीपुरवठा करण्यात आला होता. तर शहरातील आणखी काही भागांसह हद्दवाढ भागांमधील पाणीपुरवठा हा पाच दिवसांआडच ठेवण्यात आला आहे. यामुळे शहरातील त्या तीन दिवसांआड पाणीपुरवठा होणाऱ्या भागांना फारसा फरक पडणार नाही पण हद्दवाढ भागाला मात्र आता आठवड्यानंतर पाणीपुरवठा होणार असल्याने या भागातील नागरिकांची त्रेधातिरपट उडणार आहे.
