अक्कलकोट, : दुधनी-अक्कलकोट रस्त्यावरील रुद्देवाडी गावाजवळील बसस्टॉपसमोर सोमवारी दुपारी सुमारे १२ वाजण्याच्या सुमारास एसटी बस (क्र. एमएच १३ सीयू ८३३९) आणि डंपर (क्र. एमएच ०७ एयू ३९६०) यांच्यात भीषण धडक झाली. या अपघातात दोन जण जागीच ठार झाले, तर आठ प्रवासी जखमी झाले. या घटनेची नोंद दक्षिण पोलीस ठाण्यात झाली आहे. या अपघातात चंद्रकला लाडाप्पा हडपद (वय १६, रा. चिक्केहळ्ळी, ता. अक्कलकोट) आणि चांगदेव श्रीरंग लवटे (वय ७८, रा. डुक्करवाडी, पोस्ट सुकटा, ता. भूम, जि. धाराशिव) यांचा जागीच मृत्यू झाला.
तर मनोज मधुकर उगले (वय ३१, रा. वाशिम), शिवानंद चंद्रकांत बजे (वय ४०, रा. सदलापूर, ता. अक्कलकोट), लाडाप्पा मल्लप्पा हडपद (वय ३९, रा. चिक्केहळ्ळी), अमिना इब्राहिमसाब ओतीहाळ (वय ५०, रा. माशाळ), विठ्ठल मनोज उगले (वय ४, रा. वाशिम), गजानन पंडित कोलंदरे (वय १६, रा. वाशिम), निकिता पंडित कोलंदरे (वय १८, रा. वाशिम) आणि प्रियंका लाडाप्पा हडपद (वय ११, रा. चिक्केहळ्ळी) हे बसमधील प्रवासी जखमी झाले आहेत. दुधनीहून अक्कलकोटकडे येणारी गाणगापूर बस रुद्देवाडी बसस्टॉपजवळ आली असता समोरून येणाऱ्या टाटा मोटर्स कंपनीच्या डंपरचा चालक अजयकुमार अर्जुन यादव (रा. पद्मा, जि. पलामू, राज्य झारखंड) याने निष्काळजीपणे आणि भरधाव वेगाने वाहन चालवत बसला उजव्या बाजूने धडक दिल्याचे फिर्यादीत म्हटले आहे.
या घटनेची फिर्याद एसटी चालक ज्योतीराम दिलीप चव्हाण (वय ३९, रा. डिकसळ, ता. कळंब, जि. धाराशिव) यांनी दिली असून पुढील तपास सपोनि माने करीत आहेत.
