सोलापूर, : सोलापूर मध्यवर्ती एसटी बस स्थानकातील प्रवाशांच्या सुरक्षेचा बोजवारा उडाला असून लाखो रुपयांचे सीसीटीव्ही कॅमेरे बंद असल्याने एसटी प्रशासनाला अखेर जाग आली आहे. मंगळवार दि. १९ रोजी पहाटे तुटलेली केबल जोडून स्थानकातील तब्बल २२ सीसीटीव्ही कॅमेरे पुन्हा कार्यान्वित करण्यात आल्याची माहिती आगार व्यवस्थापनाकडून देण्यात आली.
उर्वरित आठ ते दहा कॅमेरेही पुढील तीन ते चार दिवसांत सुरू करण्यात येणार असल्याचे अधिकाऱ्यांनी सांगितले. पंढरपूर, अक्कलकोट आणि तुळजापूरसारख्या प्रमुख तीर्थक्षेत्रांना जोडणाऱ्या सोलापूरच्या मध्यवर्ती बस स्थानकावर दररोज हजारो प्रवाशांची वर्दळ असते. स्थानकात तब्बल २३ प्लॅटफॉर्म असून प्रवाशांच्या सुरक्षेसाठी एप्रिल महिन्यात नवीन २८ ते ३२ सीसीटीव्ही कॅमेरे आणि डीव्हीआर यंत्रणा बसवण्यात आली होती. मात्र अवघ्या काही दिवसांतच तांत्रिक बिघाडामुळे ही यंत्रणा बंद पडली होती.
यामुळे स्थानकातील सुरक्षा धोक्यात आली होती. विशेषतः महिला प्रवाशांमध्ये भीतीचे वातावरण निर्माण झाले होते. चोरी, पाकीटमारी आणि छेडछाडीच्या घटनांमुळे प्रवाशांनी संताप व्यक्त केला होता. या गंभीर प्रकाराकडे ‘नवराष्ट्र’ने लक्ष वेधल्यानंतर वरिष्ठ आगार व्यवस्थापनाने तातडीने हालचाली सुरू केल्या. मंगळवारी पहाटे २२ कॅमेऱ्यांचे चित्रण पुन्हा सुरू करण्यात आले. त्यामुळे प्रवासी व नागरिकांमधून समाधान व्यक्त करण्यात येत आहे.
