विविध मागण्यांसाठी औषध विक्रेत्यांचा जिल्हाधिकारी कार्यालयावर मूक मोर्चा; औषधांसाठी रुग्णांची धावपळ
सोलापूर : विविध प्रलंबित मागण्यांकडे सरकारचे लक्ष वेधण्यासाठी बुधवारी सोलापूर जिल्ह्यातील तब्बल साडेचार हजार मेडिकल दुकानदारांनी दुकाने बंद ठेवत जिल्हाधिकारी कार्यालयावर भव्य मूक मोर्चा काढला. या बंदमुळे शहरासह जिल्ह्यात अनेक ठिकाणी रुग्णांची औषधांसाठी तारांबळ उडाल्याचे चित्र पाहायला मिळाले. अखिल भारतीय औषध विक्रेता संघटनेच्या वतीने पुकारण्यात आलेल्या देशव्यापी औषध विक्रेता बंदला पाठिंबा देत सोलापूर शहरात मूक मोर्चाचे आयोजन करण्यात आले होते. या मोर्चात हजारो केमिस्ट बांधवांनी उत्स्फूर्त सहभाग नोंदविला.
चार पुतळा येथून सुरू झालेला हा मोर्चा जिल्हाधिकारी कार्यालय, जिल्हा परिषद मार्गे पुनम गेट येथे विसर्जित करण्यात आला. यावेळी जिल्हाध्यक्ष व्यंकटेश पुजारी, जिल्हा सचिव राजेश विरपे तसेच बसवराज मणुरे यांनी उपस्थितांना मार्गदर्शन केले. औषध विक्रेत्यांच्या विविध समस्यांवर प्रकाश टाकत सरकारने मागण्यांकडे गांभीर्याने लक्ष द्यावे, अशी मागणी त्यांनी केली. मोर्चात असोसिएशनचे पदाधिकारी गंगाधर कापसे, मनीष बलदवा, शाम बाहेती, सिद्धेश्वर घाळे, सिद्धराम चाबूकस्वार, अनंत चिटकूल, प्रताप कांचन, शहराध्यक्ष विलास कारभारी, जमीर आवटे यांच्यासह शहर व जिल्ह्यातील औषध विक्रेते मोठ्या संख्येने सहभागी झाले होते.
