सोलापूर : जुळे सोलापूर येथे प्रस्तावित नाट्यगृह उभारणीच्या पार्श्वभूमीवर आमदार सुभाष देशमुख यांनी शहरातील नाट्य कलाकार, दिग्दर्शक, साऊंड-लाईट तज्ज्ञ आणि सांस्कृतिक क्षेत्रातील मान्यवरांशी सविस्तर चर्चा केली. कलाकारांनी दिलेल्या सूचनांनुसारच सोलापुरात अत्याधुनिक व दर्जेदार नाट्यगृह उभारण्यात येईल, असे त्यांनी स्पष्ट केले. बैठकीदरम्यान कलाकारांनी पुणे व मुंबई येथील आधुनिक नाट्यगृहांच्या धर्तीवर सोलापुरातही सुसज्ज सुविधा उपलब्ध करून देण्याची मागणी केली. विशेषतः अत्याधुनिक ध्वनी व प्रकाश व्यवस्था, प्रशस्त आसन क्षमता, डिजिटल तंत्रज्ञान, कलाकारांसाठी स्वतंत्र ग्रीनरूम, सरावासाठी स्वतंत्र जागा तसेच वाहनतळ सुविधा यावर भर देण्यात आला.
या बैठकीला महापालिकेचे प्रकाश दिवाणजी, आर्किटेक्ट चिंचोली तसेच संबंधित अधिकारी उपस्थित होते. नाट्यगृहाचा आराखडा, आर्थिक व्यवहार्यता, बांधकाम खर्च आणि भविष्यातील देखभाल याबाबत अधिकाऱ्यांनी माहिती दिली. सोलापूरच्या सांस्कृतिक चळवळीला चालना देणारे आणि कलाकारांना हक्काचे व्यासपीठ उपलब्ध करून देणारे नाट्यगृह उभारण्याचा प्रयत्न राहील, असा विश्वास यावेळी व्यक्त करण्यात आला. बैठकीस नाट्य आणि सांस्कृतिक क्षेत्रातील विजय साळुंखे, जे. पी. कुलकर्णी, अमोल देशमुख, जैद शेख, डॉ. मीरा शेंडगे, शांता येळमकर, नरेंद्र गंभीरे, शिरीष देखणे आणि देवदत्त सिद्धम यांच्यासह विविध कलाकार व तज्ज्ञ उपस्थित होते.
