सोलापूर : भारत निवडणूक आयोगाने विधानपरिषद स्थानिक प्राधिकरण मतदारसंघाचा निवडणूक कार्यक्रम जाहीर केला आहे. ही निवडणूक सुरळित पार पाडण्यासाठी सोलापूर जिल्ह्यात २८ नोडल अधिकाऱ्यांची नियुक्ती करण्यात आली आहे. निवासी उपजिल्हाधिकारी तथा सहाय्यक निवडणूक निर्णय अधिकारी अभिजीत पाटील यांनी शुक्रवारी सर्व नोडल अधिकाऱ्यांसोबत बैठक घेतली.
यावेळी अतिरिक्त पोलिस अधीक्षक विजय कबाडे, पोलिस उपयुक्त अश्विनी पाटील, समाज कल्याणच्या सहायक आयुक्त सुलोचना सोनवणे, महापालिकेच्या अतिरिक्त आयुक्त विना पवार, जिल्हा प्रशासनाधिकारी नगरपालिका योगेश डोके, जिल्हा विज्ञान व सूचना अधिकारी रवी पवार, तहसीलदार दिनेश पारगे यांच्यासह संबंधित अधिकारी उपस्थित होते. निवडणुकीदरम्यान मनुष्यबळ व्यवस्थापन, प्रशिक्षण, साहित्य, वाहतूक, सायबर सुरक्षा, एसव्हीईईपी योजना, कायदा व सुव्यवस्था, आचारसंहिता पालन, खर्च निरीक्षण, मतपत्रिका व पोस्टल बॅलेट, माध्यम व्यवस्थापन, तक्रार निवारण, निरीक्षक समन्वय, दिव्यांग मतदार सुविधा, एएमएफ, स्ट्राँग रूम व मतमोजणी केंद्र, सीमा व्यवस्थापन, दारू नियंत्रण, अन्न व्यवस्थापन, वन विंडो प्रणाली, जिल्हा नियंत्रण केंद्र, सूक्ष्म निरीक्षक, सोशल मीडिया निरीक्षण व वैद्यकीय सुविधा अशा २८ क्षेत्रांसाठी स्वतंत्र नोडल अधिकारी नियुक्त केले आहेत.
